«Սպան մեխանիկորեն ձեռքից նետել է բենզինով լցված տարան, որի արդյունքում հրդեհը մեծ արագությամբ տարածվել է»․ ՀՀ զինդատախազը մանրամասներ է ներկայացրել

Ինժեներասակրավորային վաշտի սպան՝ կոչումով կապիտան, զորանոցի միջանցքի վառարանի կրակն ավելի թեժացնելու նպատակով դուրս է եկել և տարածքից բերել է պլաստմասե 5 լիտրանոց տարայով ավտոբենզին, որը վառարանի մեջ լցնելիս բռնկվել է հրդեհ, բոցից ինքն այրվել է, համազգեստը կպել է, մեխանիկորեն ձեռքից նետել է բենզինով լցված տարան, որի արդյունքում հրդեհը մեծ արագությամբ տարածվել է։ Այս մասին Հանրային հեռուստաընկերության եթերում ասաց ՀՀ զինվորական դատախազ, գլխավոր դատախազի տեղակալ Գրիգոր Էլիզբարյանը։

Էլիզբարյանը նշեց, որ սպան դեպքի գիշերը եղել է պատասխանատու հերթապահը։ Շինությունում եղել է 21 ժամկետային զինծառայող։

«Սպան գոռացել է, միջոցներ է ձեռնարկել զինվորներին հանելու համար, բայց մուտքն արգելափակվել է, եւ նրանք դռնից դուրս գալու հնարավորություն այդ պահին չեն ունեցել։ Հետագայում միջամտել են դրսում գտնվող ժամկետային մի քանի զինծառայողներ, որոնք երկու ժամկետային զինծառայողների ճաղավանդակներով պատուհանից մի կերպ կարողացել են հանել։ Այնուհետեւ ծխի եւ մրի պայմաններում գործողություններ ձեռնարկել հնարավոր չի եղել, ահազանգվել է ԱԻՆ, հրշեջ ծառայություն, շտապօգնություն»,- ասաց նա։

Զինդատախազի խոսքով այդ սպան ողջ է և գտնվում է վերակենդանացման բաժանմունքում․ «Վիճակը գնահատվում է ծայրահեղ ծանր, գիտակցություն առկա է, բայց դեռևս կոնտակտի մտնելու հնարավորությունը քիչ է, դեմքի շրջանում և մարմնի այլ մասերում ունի բազմաթիվ վնասվածքներ, շփումը սահմանափակ է»։

Մանրամասները՝ տեսանյութում։