«168 ժամ». ԲՀԿ–ՀՀԿ հակամարտությունն արհեստական էր

Երեկ ԱԺ ԲՀԿ-ական պատգամավոր Մարտուն Գրիգորյանը 75 կողմ, 4 դեմ ձայներով ընտրվել է Աժ գյուղատնտեսական և բնապահպանական հարցերով մշտական հանձնաժողովի նախագահ: Այս պաշտոնը թափուր էր մնացել Սամվել Բալասանյանի`' Գյումրիի քաղաքապետ դառնալուց հետո:

Թերթը գրում է, որ թեև այս պաշտոնը, այսպես կոչված, Դոնթի բանաձևով, ԲՀԿ-ի քվոտան է, սակայն, անկախ այդ բանաձևից և քվոտայից, Աժ մշտական հանձնաժողովի նախագահ են ընտրվում քվեարկությամբ: Այսինքն՝ եթե իշխող մեծամասնությունը ցանկանար, ապա կարող էր տապալել Մարտուն Գրիգորյանի ընտրությունն այդ պաշտոնում: Եթե անգամ Աժ-ում ԲՀԿ-ի 36 պատգամավորներին գումարենք մնացած ոչ իշխանական պատգամավորներին, ապա ստացվում է՝ 53: Այսինքն՝ իշխող մեծամասնությունը ԲՀԿ-ի կամ Մարտուն Գրիգորյանի համար ապահովել է ամբողջ 22 կողմ ձայն: Դա նշանակում է, որ եթե ՀՀԿ-ն ու ՕԵԿ-ը չմասնակցեին քվեարկությանը, ապա Մ. Գրիգորյանը չէր ընտրվի այդ հանձնաժողովի նախագահի պաշտոնում:

Այս քվեարկությունն ուշագրավ է ՀՀԿ-ԲՀԿ հարաբերությունների սրման համատեքստում: Վարդան Օսկանյանին պատգամավորական անձեռնմխելիությունից զրկելուց հետո ԲՀԿ-ն անգամ բոյկոտեց Աժ աշխատանքը: Մարտուն Գրիգորյանի ընտրությունը, սակայն, ցույց է տալիս, որ այդ հակամարտությունը եթե ոչ՝ ամբողջությամբ, ապա զգալի չափով արհեստական էր, կամ Օսկանյանին անձեռնմխելիությունից զրկելուց հետո ինչ-որ բան է փոխվել երկու կուսակցությունների հարաբերություններում:

Թերթը գրում է, որ հետաքրքիր է՝ իր ոչ խորհրդարանական գործունեության ընթացքում Մարտուն Գրիգորյանը Գյուղատնտեսության և բնապահպանության հարցերով հանձնաժողովի նախագահ ընտրվելու հարցում ո՞ւմ և որքանո՞վ է շնորհակալ լինելու՝ միայն ԲՀԿ-ի՞ն, թե՞ նաև ՀՀԿ-ին, գուցե երկուսին՝ միասին վերցրած։