«Հրապարակ». Ոստիկանությունը մեր եղբայրն է, իսկ առողջապահության նախարարը` բարի կամքի հարազատ

Շաբաթ օրը ՀՀ երկու գերատեսչություններ արտագնա սեմինարներ էին անցկացնում. ոստիկանության ղեկավար Վ. Գասպարյանը` Ծաղկաձորում, առողջապահության նախարար Դ. Դումանյանը` Աղվերանում: Պաշտոնական առիթը լրագրողների հետ ոլորտային խնդիրները քննարկելն էր՝ արդյունավետ համագործակցության նպատակով: Իրական նպատակը լրագրողներին քծնելն էր ու իրենց ազդեցությունը նրանց վրա տարածելը: Երբ Ծաղկաձորից տեղեկացրին, որ Վ. Գասպարյանը լրագրողներին ասել է՝ «մենք ձեր եղբայրներն ենք, ես ձեզ սիրում եմ՝ չա-չա-չա», ներկա լրագրողներից մեկն այդ խոսքը փոխանցեց Դերենիկ Դումանյանին և հարցրեց՝ դո՞ւք մեր ինչն եք, պարոն Դումանյան: Վերջինս փոքր-ինչ անակնկալի եկավ ու շատ ծանր ու մեծ, թե՝ «ես ձեր բարեկամն եմ. մենք էլ, լրագրողներն էլ ուզում ենք, որ մեր ժողովուրդն առողջ լինի, իր խնդիրները կարողանա լուծել»: Այսինքն՝ մեր եղբա՞յրն եք: «Տեսեք, ոստիկանության եղբայր լինելը միգուցե ձեզ հասկանալի է, բայց եկեք առողջապահության ոլորտում բարի կամքի հարազատներ լինենք»,- խուսանավեց առողջապահության նախարարը: