Ղարաբաղյան խնդրի կարգավորմանն անհրաժեշտ են նոր գաղափարներ. Ռուս քաղաքագետ

Ռազմավարական զարգացման մոդելավորման կենտրոնի փոխնախագահ ռուս քաղաքագետ Գրիգորի Տրոֆիմչուկը Regnum տեղեկատվական գործակալությանը տված իր հարցազրույցի ժամանակ, անդրադառնալով Լեռնային Ղարաբաղում հակամարտության կարգավորման հարցին, մասնավորապես ասել է. «Ղարաբաղյան հակամարտության կարգավորման գործընթացում վերջին ժամանակներս առանձնապես փոփոխություններ չեն նկատվում: Միևնույն ժամանակ գործընթացի հնարավոր զարգացման վրա ազդում է նաև իրանական խնդիրը»:

Նրա խոսքերով՝ ծավալված իրավիճակում հակամարտության կարգավորման մեջ լճացման այս փուլը չի կարող երկար շարունակվել, քանի որ միշտ էլ կգտնվեն ուժեր, որոնք կցանկանան խափանել գործընթացը:

«Նման զարգացման հնարավորությունը մեծապես կախված է Մերձավոր Արևելքում ծավալվող իրադարձություններից: Ինչքան շատ են մերձավորարևելյան խնդիրները մոտենում Անդրկովկասին, այնքան մեծանում է հավանականությունը, որ նման ապակայունացնող ուժեր իրենց մասին մի օր կհայտնեն»,-կարծում է քաղաքագետը:

Անդրադառնալով ադրբեջանական կողմից հնչող սադրանքներին այն մասին, որ Ադրբեջանը ռազմական ճանապարհով է պատրաստվում հետ գրավել Ղարաբաղը, ռազմաշունչ ճառեր է հնչեցնում, հրաժարվում է սահմանային գոտուց հետ քաշել իր դիպուկահարներին, պարբերաբար դիվերսիաներ է կազմակերպում չճանաչված Լեռնային Ղարաբաղի Հանրապետության տարածքներում, խոչընդոտում է սահմանային գոտում միջադեպերի հետաքննությանը, քաղաքագետը նշում է. «Երկու-երեք տարիների ընթացքում Ադրբեջանն անընդհատ խոսում էր զանգվածային զինված կոնֆլիկտի մասին՝ նպատակ ունենալով գրավել Ղարաբաղը: Սակայն դա տեղի չունեցավ. հետևաբար այդ հայտարարությունները շարունակում են մնալ միայն սոսկ հայտարարություններ»:

Այսուհանդերձ, քաղաքագետի կարծիքով՝ ստեղծված իրավիճակը մատնանշում է կողմերի հավասարակշիռ զսպվածության քաղաքականությունը, հակառակ դեպքում՝ տարածաշրջանը վաղուց արդեն ներքաշված կլիներ նոր արյունալի պատերազմի մեջ: