Հայաստանը բարելավել է իր դիրքերը բիզնեսի ոլորտում՝ հարևաններից զիջելով միայն Վրաստանին

Հայաստանը բարելավել է իր դիրքերը բիզնեսի վարման ոլորտում՝ բարձրանալով միանգամից 23 հորիզոնականով: Այս մասին տեղեկացնում է «Doing Business-2013» Համաշխարհային բանկի և Միջազգային ֆինանսական ընկերության վարկանշային աղյուսակը, որը տեղադրված է նրանց պաշտոնական էջում:

Նշենք, որ բիզնեսի համար բարենպաստ միջավայր ստեղծող երկրների ամենամյա ցուցակում, որը կազմում է Doing Business-ը, Հայաստանն անցյալ տարի գտնվում էր 55-րդ հորիզոնականում, և մեկ տարի անց բարելավել է իր դիրքերը՝ տեղ գրավելով եվրոպական այնպիսի երկրների միջև, ինչպիսիք են Բելգիան և Նիդերլանդները: Մեզանից առաջ է գտնվում մեր անմիջական հարևան Վրաստանը, որը, ինչպես և անցյալ տարի, այս տարի ևս զբաղեցնում է ամենաբարձր հորիզոնականը նախկին ԽՍՀՄ երկրների թվում: Այն 16-րդ հորիզոնականից բարձրացել է մինչը 9-րդ հորիզոնական: Նախկին ԽՍՀՄ պետությունների շարքում Էստոնիան 2-րդն է, Լատվիան՝ 25-րդը, իսկ Հայաստանը՝ 32-րդը: Ինչ վերաբերում է մեր մյուս հարևաններին, նշենք, որ Ադրբեջանը գտնվում է 67-րդ հորիզոնականում, Թուրքիան 71-րդն է, Իրանը՝ 145-ը: Ռուսաստանը նույնպես բարելավել է իր դիրքերը՝ բարձրանալով մինչև 112-րդ հորիզոնական:

Ցուցակը 7-րդ տարին անընդմեջ գլխավորում է Սինգապուրը, այնուհետև գալիս է Հոնգկոնգը, Նոր Զելանդիան, ԱՄՆ-ը և Դանիան: Բիզնեսի ոլորտում վատագույն երկիրն է ճանաչվել Կենտրոնական Աֆրիկայի հանրապետությունը՝ զիջելով Չադին: