Լևոն Զուրաբյանը՝ ՀՌԱՀ խորհրդի նախագահին. Եթե բան ունեք ասելու, հրապարակե՛ք դա

Երեկ Լևոն Զուրաբյանը, ԱԺ–ում ելույթ ունենալով «Հայ ազգային կոնգրես» խմբակցության անունից, Հանրային հեռուստատեսության և ռադիոյի հաղորդման քննարկման ժամանակ ասել էր. «Համաձայն «Ասպարեզ» հասարակական կազմակերպության» մոնիթորինգի, 2011 թվականին գովազդային/հովանավորչական հեռարձակումները կազմել են 636 ժամ: Համաձայն նույն կազմակերպության՝ երբ տարբեր կազմակերպություններ փորձել են դիմել հանրային հեռուստատեսությամբ գովազդ պատվիրելու նպատակով, նրանցից գովազդի մեկ րոպեի համար պահանջել են 500 դոլար: Ինքը Ալեքսան Հարությունյանն ընդունեց 120000-130000 դրամ թիվը, ինչը կազմում է 300 դոլար: Դա նշանակում է, որ միայն գովազդից/հովանավորչությունից ստացվող թիվը հավասար է 11.5 միլիոն դոլարի /եթե հաշվենք Ալեքսան Հարությունյանի՝ հրապարակայնորեն ընդունած թվերով/, մինչեւ 19 մլն դոլար, եթե հաշվենք իրական թվերով: Պաշտոնապես, Հանրայինը գովազդել և հովանավորչությունից ստացել է 930 միլիոն դրամ, այսինքն՝ 2 միլիոն 300 հազար դոլար ընդամենը: Պարզվում է, որ տարբեր հաշվակներով՝ 9 միլիոնից մինչև 17 միլիոն դոլարի չափով գումար ստացվում է գովազդային շուկայից հանրային հեռուստատեսության և ռադիոյի համար, բայց դառնում է Կայմ գործակալության համար հասույթ:
Սա պարզապես թալան է»։

Սրան ի պատասխան՝ այսօր Հանրային հեռուստառադիո խորհրդի նախագահ Ալեքսան Հարությունյանն ասաց, որ ՀԱԿ-ն ունի բավականին լավ տնտեսագետ՝ Հրանտ Բագրատյանը, և Լևոն Զուրաբյանին խորհուրդ տվեց մոտենալ Բագրատյանին. «Հրանտ Բագրատյանը ձեր ներկայացրած թղթերով Ձեզ հանրամատչելիորեն կբացատրի»։

Ի պատասխան Հարությունյանի՝ Զուրաբյանն ասաց. «Դա անհեթեթություն է, որ Բագրատյանը մեզ կբացատրի։ Ես կառաջարկեի շատ ավելի լուրջ մոտեցում ցույց տայիք։ Եթե բան ունեք ասելու, հրապարակե՛ք դա։ Այստեղ ո՞ր թիվն է սխալ։ Եթե այդ թվերը սխալ չեն, ուրեմն այն թվերը, որոնք ես հրապարակել եմ, բացարձակ ճիշտ են։ Դուք անգամ համարձակություն չգտաք ձեր մեջ փորձել արգումենտներով դա հերքելու, որովհետև դուք արգումենտ չունեք, որովհետև գոյություն ունի այն թալանը, որի մասին ես խոսեցի»։