Էդուարդ Շարմազանովը՝ Հայաստանի՝ ԵՄ և Եվրասիական միության հետ հարաբերությունների մասին

Լուրեր.com–ի զրուցակիցն է ԱԺ փոխնախագահ, ՀՀԿ խոսնակ Էդուարդ Շարմազանովը։

–Պարոն Շարմազանով, մամուլում շրջանառվում են լուրեր, որ նոյեմբերի 11-14-ը ԱՊՀ երկրների մասնակցությամբ Երևանում տեղի կունենա Եվրասիական միության հարցերին նվիրված միջկուսակցական ֆորում, որը տեղի է ունենալու Արմեն Աշոտյանի հրավերով։ 

Նախ ասեմ, որ Եվրասիական միության հետ կապված որևէ պաշտոնական քննարկում մեր կուսակցությունում չի եղել և որևէ մեկն այդ մասին դեռ չի քննարկել։ Այն, որ մեր կուսակցությունը շատ մեծ նշանակություն է տալիս արտաքին կապերին և մեր կուսակցությունն ունի շատ լուրջ գործնական կապեր թե՛ «Եդինայա Ռոսիա» կուսակցության հետ, թե՛ նաև ԵԺԿ անդամ է։ Սա նորմալ է, և ի վերջո, մեր կուսակցությունը կազմակերպել է Ստեփանակերտում քաղաքական համաժողով, որին մասնակցեցին բացառությամբ ՀԱԿ-ի բոլոր պառլամենտական կուսակցությունները։ Եվ այդ իմաստով պետք չէ զարմանալ, որ Հանրապետական կուսակցությունը կազմակերպում է նաև միջկուսակցական ֆորում, քանի որ միջկուսակցական կապերը կարող են լավ ամբիոն լինել մեր արտաքին քաղաքական խնդիրների քննարկման և լուծման համար։ Կոնկրետ ԵՄ հետ կապված ինձ դեռ ոչինչ հայտնի չէ, որովհետև մենք երբեք ո՛չ խորհրդում, ո՛չ գործադիրում այդ հարցը չենք քննարկել, բայց այն, որ պարոն Աշոտյանի ջանքերով մեր մոտ նաև կուսակցական կապերը ամրապնդվում են և ավելի լավ դինամիկա է երևում, դա փաստ է, ես ինքս էլ մասակցելու եմ այդ համաժողովին։

–Եթե հաշվի առնենք այն հանգամանքը, որ ՀՀԿ-ն ավելի շատ դիտվում է որպես ԵՄ նայող կուսակցություն և լինելով ԵԺԿ դիտորդ անդամ, արդյոք խնդիրներ չե՞ն առաջացնում Եվրասիական միության կողմնակիցների հետ նման ֆորմատի հանդիպումները։

Ո՛չ, ՀՀԿ–ն կա և կմնա Հայաստանի կողմից։ Մեկ անգամ նման հարցի շատ դիպուկ պատասխանել է Սերժ Սարգսյանը, երբ որ Russia today-ից Գուռլովը հարցրեց «Պարոն Սարգսյան դուք արևմտամե՞տ եք, թե՞ ռուսամետ», ինքը պատասխանեց, ես ո՛չ ռուսամետ եմ, ո՛չ արևմտամետ եմ, ես հայամետ եմ և հայաստանամետ եմ։ Եվ այդ իմաստով ՀՀԿ–ի թիվ մեկ կարևորությունը և առավելությունը կայանում է նրանում, որ Հանրապետական կուսակցության բոլոր լիդերները և ՀՀԿ քաղաքական էլիտան միշտ եղել է հայաստանակենտրոն, հայամետ, բայց դա չի նշանակում, որ մենք չենք զարգացրել մեր հարաբերությունները Եվրոպայի Միության և Ռուսաստանի հետ։ Այսքան տարիների ընթացքում դուք պետք է տեսնեիք, կան փաստեր, որ Սարգսյանի կառավարման տարիներին Հայաստանը շահեկանորեն բարձրացրել է իր հարաբերությունների մակարդակը թե՛ ԱՄՆ–ի, թե՛ Եվրամիության երկրների հետ։ Դրա վառ ապացույցն է Արևելյան գործընկերությունների ասոցացման համաձայնագիրը, թե՛ Ռուսաստանի Դաշնության, ինչու չէ նաև այլ երկրների հետ։

–Այնուամենայնիվ, լինելով ԵԺԿ դիտորդ անդամ՝ արդյոք խնդիրներ չե՞ն առաջացնում Եվրասիական միության կողմնակիցների հետ նման ֆորմատի հանդիպումները։

Մենք կա՛մ–կա՛մ–ի կողմնակից չենք, մենք և՛-և՛–ի կողմնակից ենք, մենք խորը ինտեգրացիոն գործընթացների կողմնակից ենք, թե՛ ԱՊՀ տարածաշրջանում, թե՛ Եվրոպական տարածաշրջանում, բայց դրանք ոչ թե ինքնանպատակ են, այլ այդ բոլոր ինտեգրացիոն գործընթացերը ի շահ մեր երկրի և մեր քաղաքացիների է։

–Ըստ մամուլի՝ ԲՀԿ-ն ևս հրավիրված է ֆորումին, ԱԺ մյուս խմբակցություններին հրավեր լինելո՞ւ է։

Դեռ կազմակերպչական աշխատանքները ավարտված չեն, երբ որ կազմակերպչական աշխատանաքները ավարտվեն, բոլոր հրավերները ուղարկվեն, ՀՀԿ համապատասխան լրատվական ծառայությունը ձեզ կտեղեկացնի։