Աջակցություն Հայաստանում գտնվող սիրիահայերին. «Օգնիր եղբորդ» նախաձեռնություն

Սիրիահայ համայնքի աջակցության «Օգնիր եղբորդ»նախաձեռնությունը շարունակում է իր աշխատանքները: Ընդամենը մեկ շաբաթ առաջ՝ հոկտեմբերի 15-ին, Սիրիա տեղափոխվեց մարդասիրական օգնության առաջին խմբաքանակը՝ 14 տոննա պարեն։ Այսօր «Սիրիական ավիաուղիների» Երևան- Հալեպ թռիչքով Սիրիա կփոխադրվի երկրորդ փուլի հումանիտար բեռը: Ըստ նախնական ծրագրի կորդեգրվի հումանիտար բեռը փոխադրելու այս ճանապարհը։ «Օգնիր եղբորդ» նախաձեռնության շրջանակներում մինչև օրս կուտակվել է 45 տոննա պարենամթերք։

Մեր տասնյակ համաքաղաքացիներ, հայրենի մտավորականներ, քաղաքական գործիչներ և գործարարներ շարունակում են արձագանքել սիրիահայ համայնքին նյութական և բարոյական աջակցություն ցուցաբերելու մեր կոչին։

Նախաձեռնությանը միանում են նորանոր կազմակերպություններ՝ «Սիվիլիթաս» հիմնադրամը՝ փոխանցելով 3 մլն դրամ, «Դինո գոլդ մայնինգ»-ընկերությունը՝ 1 միլիոն դրամ, «Ավեստա» ընկերությունը՝ 100000 դրամ, Պռոշյանի գինու և կոնյակի գործարանը' 3000 տուփ բանջարեղենային պահածո։ Դրամական փոխանցումներ են եղել նաև մի շարք մտավորականների՝ դերասաններ Ազատ Գասպարյանի, Անդրանիկ Հարությունյանի, նկարիչ Հաղթանակ Շահումյանի, ֆրանսահայ գրող Մովսես Փչաքճեանի կողմից:

Հիշեցնենք, որ մինչ այս նախաձեռնությանն էին միացել ԼՂՀ Գյուղի և գյուղաջակցության հիմնադրամը, «Ալեքս Գրիգ» «Արտֆուդ», «Աշտարակ կաթ», «Մարիաննա», «Սաս գրուպ», «Գրանդ հոլդինգ», «Միկ մետալ» «Պրոտոն, «Իզոտոպ Դելտա», «Հայռուսգազարդ», «Արմսվիսբանկ», «Հարվալ Մաշինարի» ընկերությունները, «Նուշիկյան ասոցիացիան», «Գագիկ Ծառուկյան» բարեգործական հիմնադրամը, «Վիվասել-Մտս» ընկերությունը, Երևանի 19-րդ ամբուլատորիան, Սեբաստիա բժշկական կենտրոնները, «Էլեն-Նարե» ծննդօգնության կենտրոնի աշխատակիցները, ԱԺ «Հանրապետական», «Օրինաց երկիր» և «Հայ հեղափոխական դաշնակցություն» խմբակցությունները:

«Օգնիր եղբորդ» նախաձեռնության շրջանակներում շարունակվում է նաև Վիվասել-Մտս-ի կապի ծառայության ցանցում sms նվիրատվության ակցիան, որի մեկնարկից դեռ մեկ շաբաթ է անցել, բայց արդեն շուրջ 6300 բաժանորդ իր ազգային տուրքին։

Այժմ նախաձեռնության կողմից իրականացվում են նաև աշխատանքներ Հայաստանում գտնվող սիրիահայերին աջակցություն ցուցաբերելու ուղղությամբ: Առաջիկա օրերին պարենային աջակցություն կցուցաբերվի Հայաստանում հաստատված կարիքավոր սիրիահայ ընտանիքների։

«Օգնիր եղբորդ» նախաձեռնող խումբն իր երախտագիտությունն է հայտնում բոլոր անհատներին, գործարարներին, քաղաքական և բարեսիրական կազմակերպություններին, որոնք իրենց շատ կարևոր ներդրումն են բերում հակամարտության արդյունքում անդառնալի կորուստներ կրող սիրիական համայնքին։