Քարերի սիմֆոնիան վտանգված է (տեսանյութ)

Հոկտեմբերի 22-ին որոշ քաղաքացիների կողմից ահազանգ ստացվեց, որ Գառնու ձորում նորից ոչնչացվում են «Քարերի սիմֆոնիայի» սյունաձև քարերը: Lurer.com-ի թղթակիցը տեղում ծանոթացավ իրավիճակին:

Այս վայրում, որը հայտնի է «Քարերի սիմֆոնիա» անվամբ և պատմամշակութային մեծ արժեք է ներկայացնում, կային թափված քարեր։ Սակայն դժվար էր որոշել՝ դա բնական քարաթափում էր, թե՝ մարդածին: Տվյալ հատվածից մոտ մեկ կիլոմետր այն կողմ՝ «Սպիտակ տուն» կոչվող շինության տակ, նմանատիպ քարաժայռեր կային քանդված և ակնհայտ երևում էր, որ այդտեղ առկա է մարդկային գործոնը:

Ականատես քաղաքացիներից Սամվել Հովհաննիսյանը նշում է, որ հոկտեմբերի 22-ին հենց այդ վայրից տեղափոխել են սյունաձև քարեր: Ցանկանում ենք նշել, որ այդ տարածքում կա 3 բնության հուշարձան՝ հատուկ պահպանվող տարածք: Սակայն Գառնու գյուղապետ Աշոտ Վարդանյանն այդտեղ նշում է միայն մեկ պահպանվող տարածք և փաստում, որ այդ հատվածը պահպանվող տարածք չէ և սեփականաշնորհված է, ինչպես նաև նշեց, որ դա արդեն Արարատի մարզի տարածքն է:

Այդ հատվածը հանդիսանում է պահպանվող տարածք, թե՝ ոչ, քարաթափումը տեղի է ունեցել մարդկային գործոնի ազդեցությամբ, թե՝ ոչ, դա պատկան մարմինների քննության հարցն է, բայց այն, որ այդտեղ գտնվող բնության հուշարձաններն իսկապես վտանգված են, դա ակնհայտ է: Այնպես որ հարկ ենք համարում հրավիրել պատկան մարմինների ուշադրությունն այս խնդրին և հուսով ենք շուտով կլսենք պատասխանատուների արձագանքը: