35 000 դրամ աշխատավարձով քանի՞ օր կարող է քաղաքացին ապրել ՀՀ-ում. Զարուհի Փոստանջյանը՝ Ֆինանսների նախարարին

Վերջին լուրեր 23 Հոկտեմբեր, 2012 16:16

ՀՀ ֆինանսների նախարար Վաչե Գաբրիելյանն այսօր ԱԺ քառօրյայի ժամանակ ներկայացրեց նվազագույն աշխատավարձի չափը փոփոխելու մասին նախագիծը: Նախարարի խոսքերով՝ առաջարկվում է նվազագույն ամսեկան աշխատավարձը սահմանել 35 հազար դրամ: «Սա առաջին քայլն է այն քաղաքականության մեջ, որը մենք իրականացնում ենք: Մասնավորապես ենթադրվում է միջին ամսական աշխատավարձի չափը հինգ տարվա ընթացքում հասցնել 65 հազարի, ընդ որում, 2014 թվականին ենթադրվում է նվազագույն աշխատավարձի չափը հասցնել 45 հազարի, ապա 55 հազար և աստիճանաբար բարձրացնել»:

Նախագիծը ներկայացնելուց հետո Վաչե Գաբրիելյանին իր հարցն ուղղեց «Ժառանգություն» խմբակցության պատգամավոր Զարուհի Փոստանջյանը, հարցնելով, թե այդ 35 հազար դրամով քանի՞ օր կարող է քաղաքացին ապրել ՀՀ-ում: Հարցին պատասխանելով՝ Գաբրիելյանն ասաց. «Բնականաբար նվազագույն աշխատավարձի տեսակետից մենք եկեք չնայենք, թե քանի օր կարող է ապրել, նայենք՝ ինչքան ավելի շատ կարող է այդ միջոցները ծախսել նախկինում հաստատվածի նկատմամբ: Ես կարող եմ վստահեցնել, որ մի փոքր ավելի շատ, քան նախկինում, մինչև 7, 8 տոկոսով ավելի շատ գումար կունենա ծախսելու»,-նշեց Վաչե Գաբրիելյանը:

Ի պատասխան վերջինիս հնչեցրած տեսակետին՝ Զարուհի Փոստանջյանը ևս մեկ հարց ուղղեց՝ ասելով. «Իսկ կարող ե՞ք ասել, թե Ձեր նշած 7, 8 տոկոսով ի՞նչ կարող է գնել քաղաքացին»: Վաչե Գաբրիելյանն ասաց. «2500 դրամով նա կարող է գնել ապրանքային զամբյուղի բազմաթիվ ապրանքներ, որը կարելի է ծանոթանալ ցանկացած խանությում»,-նշեց Գաբրիելյանը: