Մեր կյանքը փրկարարների ամուր բազուկներում է

Հոկտեմբերի 23-ին Երևանի թիվ 8 հրշեջ մասի վարչական շենքում տեղի ունեցավ հրշեջ-փրկարարների միջև անցկացվող բազկամարտի առաջնության եզրափակիչ փուլը։

Եզրափակչին մասնակցում էր ՀՀ արտակարգ իրավիճակների նախարարության փրկարար ծառայության 13 հրշեջ-փրկարար, ովքեր հաղթող էին ճանաչվել իրենց ստորաբաժանումներում անցկացված մրցումներում։

Բազկամարտիկ հրշեջ-փրկարարների միջև պայքարը թեժ էր, քանի որ մասնակիցները ֆիզիկապես շատ լավ պատրաստված էին և հաղթելու կամքով լի։ Բոլորն արժանապատիվ ելույթ ունեցան՝ ցույցադրելով հայ փրկարարի բազկի ուժը, որը մեկ անգամ չէ, որ մարդկային կյանքեր է փրկել։

Մոտ մեկ ժամ տևած եզրափակիչ մրցափուլում հաղթող ճանաչվեց Երևանի թիվ 1 հրշեջ-փրկարարական ջոկատի վարորդ, սերժանտ Արամ Հովհաննիսյանը։

Երկրորդ պատվավոր տեղը զբաղեցրեց Սյունիքի մարզից Քաջարանի հրշեջ-փրկարարական ջոկատի հրշեջ, սերժանտ Նարեկ Շահնազարյանը։

Երրորդ տեղի համար պայքարում հաղթեց Արմավիրի մարզի Արմավիր քաղաքի հրշեջ-փրկարարական ջոկատի հրշեջ, ավագ սերժանտ Ռոբերտ Ամիրխանյանը։

Բազկամարտի մրցաշարի հաղթողները պարգևատրվեցին ՀՀ ԱԻՆ փրկարար ծառայության պատվոգրերով։

Առաջնության արդյունքներն ամփոփելով՝ ՀՀ ԱԻՆ փրկարար ծառայության մարտական պատրաստության բաժնի պետ, գնդապետ Սարգիս Կյուրեղյանն ասաց. «Այս մրցաշարն ավանդական բնույթ ունի։ Մենք այն արդեն երրորդ անգամ ենք անցկացնում։ Մեզ աջակցել է նաև Հայաստանի բազկամարտի ֆեդերացիան՝ տրամադրելով գույք՝ բազկամարտի սեղան, և մրցավար-դատավորներին։ Տղաները շատ լավ ելույթ ունեցան և բարձր ֆիզիկական պատրաստվածություն ցույց տվեցին, ինչը հրշեջ-փրկարարի արդյունավետ աշխատանքի կարևորագույն գրավականներից է»։