Սեմինար՝ տնօրենի ուսումնական աշխատանքի գծով տեղակալների համար

Ամենամսյա մասնագիտական հավաքների շրջանակում «Դպրոց-կենտրոնների միություն» իրավաբանական անձանց միությունը կազմակերպել էր ուսումնական աշխատանքի գծով տնօրենի տեղակալների համար նախատեսված սեմինար, որին մասնակցել են Երևանի և ՀՀ տարբեր մարզերի հանրակրթական դպրոցների, կրթության և գիտության նախարարության, միջազգային կառույցների ներկայացուցիչներ և ԱԺ պատգամավորներ:

Նախապես հայտարարված մրցույթի արդյունքներով ընտրվել են տնօրենի՝ ուսումնական աշխատանքի գծով տեղակալների լավագույն 3 փաթեթներ, որոնք էլ ներկայացվել են սեմինարի ընթացքում և էլեկտրոնային ու տպագրված տարբերակներով տրամադրվել մասնակիցներին: Սեմինարին ներկայացվել են նաև ներդպրոցական վերահսկողության և գիտամեթոդական աշխատանքների կազմակերպման օրինակելի փաթեթ, առաջարկվել է ուսուցիչների թեմատիկ և սխեմատիկ պլանավորումների կազմման հետաքրքիր օրինակներ: Տեղի է ունեցել առաջավոր փորձի փոխանակում, ինչպես նաև հարց ու պատասխանի միջոցով բացահայտվել և քննարկվել են տնօրենի՝ ուսումնական աշխատանքի գծով տեղակալների գործունեության ընթացքում հանդիպող դժվարություններն ու խնդիրները: Ներկայացվել են մի շարք առաջարկություններ՝ նրանց գործունեությանն աջակցելու նպատակով: Տնօրենի՝ ուսումնական աշխատանքի գծով տեղակալները շնորհակալություն են հայտնել իրենց ընձեռված այս բացառիկ հնարավորության համար: Սեմինարի ավարտին բոլոր մասնակիցներին շնորհվել են մասնակցության հավաստագրեր: