Փրկել է թոշակառու հարևանուհուն և չի բարձրաձայնել սխրանքի մասին

Տոմսկի շրջանի Բակչար գյուղում ոստիկանության ավագ սերժանտ Վիտալի Վոյակինը ծեր կնոջն ազատել է կրակի «կապանքներից», ապա հեռացել՝ չկիսվելով հանրության հետ իր հերոսական արարքի մասին։ Բաժանմունքում այդ մասին իմացել են, երբ ոստիկանություն է դիմել մի տղամարդ և պատմել միջադեպի մասին, հաղորդում է newsru.com-ը՝ հղում անելով ՌԴ ՆԳՆ-ի Տոմսկի շրջանի վարչության կայքէջին։

Բանն այն է, որ միջադեպին ընդառաջ՝ 26-ամյա ոստիկանը տանն է եղել և հանկարծ նկատել է, որ հարևանությամբ գտնվող տունը վառվում է և շտապել է դեպքի վայր։ Հարցուփորձ անելով՝ վերջինս պարզել է, որ հարևանը մի ծեր կին է իր որդու հետ ապրող, և նետվել է նրանց փրկելու։ Վազելով դեպի կրակի ճիրաններում գտնվող տունը՝  մոտակայքում հավաքվածներին հարցրել է՝ արդյոք տանը մարդ կա, թե ոչ։ Չսպասելով պատասխանին՝ քարով կոտրել է պատուհանը և ներս մտել։

Տան խորքում ծանր ծխի միջից ոստիկանը նկատել է թոշակառու Վասսա Մարկովնային, պարզաբանում է «Вести-Томск»-ը։ Կրակը գրավել էր տանիքը, նախամուտքը, այդ իսկ պատճառով Վոյակինը դուրս է հանել տատիկին պատուհանով։ Նա ուշագնաց է եղել, սակայն քիչ ուշ գիտակցության եկել և տեսել է, թե ով է նրան փրկել։

Ըստ որոշ տեղեկությունների՝ թոշակառուի հաշմանդամ տղան, այրվածքներ ստանալով, դուրս է պրծել վառվող դռան միջով։ Ամեն ինչ լավ ավարտ է ունենում, իսկ ոստիկանը նախընտրում է չբարձրաձայնել իր սխրանքի մասին։

Գործընկերներն այդ մասին իմացել են մի քանի օր անց, երբ ականատեսից ահազանգ են ստացել, ապա նկատել են Վոյակինի՝ կոտրված ապակուց կտրված ձեռքը։ Տոմսկի շրջանի ՆԳՆ վարչության ղեկավարը՝ գեներալ-մայոր Իգոր Միտրոֆանովը, կդիմի վերադասին՝ ՆԳՆ–ին, Վոյակինին հերոսության համար պետական շքանշան շնորհելու համար։