Hurriyet. Թուրքիան սպասում է, թե երբ է Իսրայելն ուղղելու իր սխալները

Թուրքիան սպասում է, թե երբ է Իսրայելն ուղղելու իր սխալներն Անկարայի հետ հարաբերություններում և միայն դրանից հետո հնարավոր կլինի խոսել հարաբերությունների կարգավորման մասին այս երկու պետությունների միջև. հայտարարել է Թուրքիայի ԱԳ նախարար Ահմեդ Դավութօղլուն, որին մեջբերում է Hurriyet-ը:

«Թուրքիան չի խուսափում Իսրայելի հետ հարաբերությունների կարգավորումից: Սակայն դրա համար անհրաժեշտ է, որ Իսրայելը հասկանա իր սխալներն ու քայլեր ձեռնարկի դրանք ուղղելու համար»,-ասել է Դավութօղլուն:

Ավելի վաղ Իսրայելի ԱԳՆ-ը հայտնել էր, որ իրենք պատրաստ են նստել բանակցությունների սեղանի շուրջ՝ առանց որևէ նախապայմանի հարաբերությունները կարագավորելու նպատակով:

Հարաբերությունները Թուրքիայի և Իսրայելի միջև, որոնք մինչև վերջերս ռազմա-քաղաքական ոլորտում սերտ համագործակցության մեջ էին գտնվում, խիստ լարվել էին անցյալ տարվա մայիսի 31-ին Գազայի հատվածին հումանիտար օգնություն ցուցաբերող «Ազատության նավատորմ»-ի վրա իսրայելական հատուկ նշանակության զորքերի կազմակերպած հարձակումից հետո:

Այս հարձակումից հետո, որին զոհ էր դարձել Թուրքիայի 9 քաղաքացի, Անկարան հայտարարեց Թել Ավիվի հետ իր հարաբերությունների վերանայման մասին և պահանջեց պաշտոնապես ներողություն խնդրել և հատուցում վճարել տուժածների ընտանիքներին: Դրան ի պատասխան՝ Իսրայելը հայտարարեց, որ չի պատրաստվում ներողություն խնդրել: Թուրքիան հայտարարեց, որ Իսրայելի հետ իր հարաբերություններն այսուհետ անցնում են երկրորդական մակարդակ: Անկարան սառեցրեց իր ռազմական համագործակցությունն Իսրայելի հետ և հետ կանչեց իր դեսպանին: