Չինաստանն ու Ճապոնիան գաղտնի բանակցություններ են վարել վիճելի կղզիների շուրջ. ԶԼՄ-ներ

ԶԼՄ-ները հաղորդում են, որ Ճապոնիայի ԱԳ նախարար Տիկաո Կավաին այցելել է Շանհայ, ուր հանդիպել է ՉԺՀ-ի արտաքին քաղաքական հարցերով գերատեսչության ղեկավարի տեղակալ Չժան Չժինցյունի հետ. փոխանցում է Интерфакс-ը:

Եղած տեղեկությունների համաձայն ՝ երկու երկրների դիվանագետները համամիտ են այն հարցի շուրջ, որ երկու երկրների միջև անհրաժեշտ է «երկխոսություն շարունակել»:

Գաղտնի բանակցությունների մասին, որոնք վարել են Չինաստանի և Ճապոնիայի ԱԳՆ ներկայացուցիչները Արևելաչինական ծովում վիճելի համարվող Սենկակու կղզեխմբի շուրջ, տեղեկություններ է հաղորդում նաև հոնգկոնգյան «Ֆենխուան» հեռուստաընկերությունը:

Հեռուստաընկերության տվյալներով՝ նախօրոք պայմանավորված հանդիպման ժամանակ «կողմերը խորհրդակցություն են վարել երկկողմ հարաբերություններում առկա խնդիրների մասին»:

Չնայած նրան, որ Ճապոնիան և Չինաստանը պաշտոնապես չեն հայտարարել կայանալիք բանակցությունների մասին, երեքշաբթի օրը ճապոնական կառավարության գլխավոր քարտուղարը մամլո խորհրդակցության ժամանակ հայտարարել է, որ այդ հանդիպումը եղել է «բանակցությունների մի մասը»:

Հիշեցնենք, որ Չինաստանի և Ճապոնիայի միջև հարաբերությունները սրվել էին Հարավչինական ծովում անմարդաբնակ կղզեխմբի շուրջ ծավալված տարաձայնության պատճառով, որը վերջերս սուր բնույթ էր ստացել: Չանսալով չինական կողմի զգուշացումներին՝ Ճապոնիան առանձին անհատներից գնել էր Հարավչինական ծովի կղզիները, ինչն էլ առաջ էր բերել Պեկինի զայրույթը: