Երեխային կրթության իրավունքից զրկելը բռնություն է. Անահիտ Բախշյան (տեսանյութ)

«Բոլոր երեխաները պետք է իրար հետ սովորեն անկախ իրենց կարողություններից։ Ներառական կրթության մասին օրենքով մենք հեծանիվ չենք հորինում»։ Այս մասին լրագրողների հետ հանդիպմանն ասաց Կրթության փորձագետ Անահիտ Բախշյանը՝ խոսելով Հայաստանում ներառական կրթական համակարգի վերաբերյալ։

Անահիտ Բախշյանը, անդրադառնալով դպրոցներում ներկա իրավիճակին, հիշեց միայն մի դպրոց, որը հարմարեցված է հաշմանդամություն ունեցող երեխաներին, նկատում է նաև, որ հաճախ վերանորոգված դպրոցներում նորից անուշադրության են մատնված նրանց տեղաշարժման խնդիրները, օրինակ թեքահարթակներ կամ չկան, կամ էլ լինելու դեպքում ավելի անհարմար են և «հաշմանդամություն պատճառող»։ «Երեխային զրկել կրթության իր իրավունքից դա բռնություն է»,-հավելեց վերջինս։

Ըստ Անահիտ Բախշյանի՝ ներառական կրթության ամեն օր մենք պետք է պատրաստվենք։ Երբ երեխան դասարանում է իր բոլոր խնդիրներով, արդեն պայմանները կթելադրեն առկա խնդիրների լուծման տարբերակները։

Ասուլիսի մյուս բանախոս՝ «Հույսի կամուրջ» ՀԿ ղեկավար Սուսաննա Թադևոսյանն ասաց. «Տավուշի մարզում եղավ ներառական կրթության անցնելու փորձը և մարզի բոլոր հիմնական դպրոցներն անցան ներառական կրթության։ Ներառական կրթությունը պետք է միշտ դիտարկել երեխայի իրավունքի տեսանկյունից և յուրաքանչյուրն իրավունք ունի կրթություն ստանալու։ Ներառական կրթությունը հնարավորություն է տալիս բոլորին՝ մասնակցել կրթություն ստանալու գործընթացին»։

Բանախոսը նկատում է նաև, որ սա այն եզակի դեպքերից է, երբ հետազոտության հիման վրա են գրվել օրենքները, չնայած այսօր դպրոցներում տեղաշարժման խնդիր կա։ Քաղաքաշինությամբ զբաղվող ոլորտը պետք է զբաղվի այս լուրջ խնդրով։