Կառավարության առաջարկը զավեշտ է. Նաիրա Զոհրաբյան

«Մեզ համար բացարձակապես տարակուսելի չէ, որ այս տնտեսական քաղաքականություն վարող կառավարությունը կարող էր այսպիսի օրինագիծ ներկայացնել ԱԺ»,-անդրադառնալով աշխատավարձը 2500 դրամով բարձրացնելու նախագծին՝ ասաց ԲՀԿ խմբակցության քարտուղար Նաիրա Զոհրաբյանը։

Նշենք, որ  Ազգային ժողովի հոկտեմբերի 23-ի նիստում ՀՀ ֆինանսների նախարար Վաչե Գաբրիելյանը ներկայացրել էր «Նվազագույն աշխատավարձի մասին» ՀՀ օրենքում փոփոխություններ կատարելու մասին» ՀՀ օրենքի նախագիծը, տեղեկացնելով, որ օրենքով նախատեսվում է նվազագույն ամսական աշխատավարձը 2013թ. համար սահմանել 35000 դրամ, այսինքն՝ 2500 դրամով բարձրացնել:

Նրա խոսքերով՝ ԲՀԿ–ն բացասական է վերաբերում այս նախագծին։ 

«Այստեղ ասվեց, որ 35.500-35.000-ից ավելի լավ է, երևի թե 36.000-ն էլ ավելի լավ կլինի 35.500-ից։ Բայց արդյոք նման կարևոր նախագիծ, որ վերաբերում է Հայաստանի յուրաքանչյուր քաղաքացու, մենք պե՞տք է առաջնորդենք և ընտրություն կատարենք վատի և վատագույնի միջև»,– ասաց Նաիրա Զոհրաբյանը և հավելեց, որ նվազագույն աշխատավարձը պետք է առնվազն ապահովի նվազագույն կարիքները, որ Հայաստանի քաղաքացիներն արժանապատիվ ապրեն. «Այդ թիվը, որ առաջարկվում է կառավարության կողմից, առնվազն զավեշտ է»։