Հարվարդում թուրք պրոֆեսորը գիրք է հրապարակել Հայոց ցեղասպանության մասին

Հարվարդի համալսարանում բազմաքանակ հանդիսատես է հավաքվել՝ լսելու թուրք պրոֆեսոր Թաներ Աքչամին, ով խոսելու է իր հեղինակած վերջին գրքի մասին՝ «Երիտթուրքերի ոճրագործությունը մարդկության հանդեպ. Հայոց ցեղասպանությունն ու էթնիկ զտումը Օսմանյան կայսրությունում» վերնագրով. հաղորդում է The Armenian Mirror-Spectator պարբերականը: 

Աքչամը թուրքական ծագում ունեցող միակ գիտնականն է, ով գլխավորում է հայագիտության ամբիոնը և զբաղվում թուրքական արխիվներում Հայոց ցեղասպանությանը վերաբերող փաստերի ուսումնասիրությամբ: Իր վերջին գրքում նա լայնորեն օգտագործել է արխիվներից քաղած իր նյութերը: Դրանում տեղ է գտել թուրքական արխիվներում պահվող և այդ ժամանակաշրջանին վերաբերող 600 փաստաթուղթ:

Հեղինակն ասում է, որ Ցեղասպանությունն ուսումնասիրելիս ինքը երկու հարցի է անդրադարձել, այն է՝ ինչպես դա պատահեց, և ինչու պատահեց: Հեղինակը նշել է, որ դեռևս երկար ճանապարհ կա անցնելու՝ այդ հարցերին պատասխաններ գտնելու համար:

Նա կարծում է, որ երկու տարբեր կարծիք կա Օսմանյան արխիվների վերաբերյալ: Հայերը, որոնք չեն վստահում այդտեղ պահվող նյութերին, կարծելով, որ այնտեղ հավաքված են միայն թուրքկան իշխանությունների կողմից թույլատրված փաստաթղթեր: Եվ թուրքերը, ովքեր ժխտում են Հայոց ցեղասպանության փաստը, ենթադրելով, որ կարելի է միայն օսմանյան աղբյուրներին հավատալ, քանի որ ցանկացած հայկական և արևմտյան նյութ այդ հարցի շուրջ կասկածելի է:

Հեղինակն իր այս նոր գրքով փորձել է ցույց տալ, որ «Օսմանյան արխիվներում պահվող նյութերն ապացուցում են այն նույն տեղեկությունը, որն առկա է գերմանական, ամերիկյան և բրիտանական արխիվներում»: