Դավութօղլուի արձագանքը Լավրովի հայտարարությանը

Ռուսաստանի արտգործնախարար Սերգեյ Լավրովի արած հայտարարությանը կոշտ է արձագանքել թուրք գործընկերը` Ահմեդ Դավութօղլուն. տեղեկացնում է Hurriyet-ը։

Սերգեյ Լավրովը, նախօրեին անդրադառնալով Թուրքիայում ստիպողաբար իջեցված Մոսկվա-Դամասկոս քաղաքացիական ինքնաթիռի միջադեպին, Թուրքիայից պահանջել էր ցուցադրել հայտնաբերված զինամթերքը, կամ հայտարարել, որ ինքնաթիռում ռազմական ուղեբեռ չի եղել։

Լավրովին ի պատասխան` Դավութօղլուն հայտարարել է. «Դուք, միջազգային իրավունքը խախտելով, մտածելով, որ չենք նկատի ու «կուլ կտանք», քաղաքացիական ինքնաթիռով ռազմական բեռ եք ուղարկում և ցանկանում եք դա անցկացնել մեր տարածքով։ Մենք կիջեցնենք նման ինքնաթիռը»։

Թուրքական «Բուգյուն» հեռուստաընկերությանը տված հարցազրույցում նա հայտարարել է, որ իջեցված սիրիական ինքնաթիռում հայտնաբերվածի անգամ ավելի քիչ մասի գտնվելը քաղաքացիական ինքնաթիռում արդեն օրենքի խախտում է։

Դավութօղլուն անդրադարձել է նաև Թուրքիայի հետ առանց նախապայմանների հարաբերություններ սկսելու վերաբերյալ Իսրայելից հնչած հայտարարություններին. «Իսրայելը փորձում է այնպիսի տպավորություն ստեղծել, թե իբր պատրաստ է բանակցելու, իսկ Թուրքիան խուսափում է։ Իսրայելը հանցավոր է։ Թուրքիան սպասում է, որ նա համապատասխան քայլեր ձեռնարկի և շտկի սխալը։ Վերջին շրջանում միայն մամուլով չեն այդ հաղորդագրությունները։ Որ արտգործնախարարի հետ հանդիպում եմ, Իսրայելից «մեսիջ» են փոխանցում, նշելով, որ Իսրայելը պատրաստ է հարաբերությունների շտկմանը։ Եթե պատրաստ եք, ուրեմն գիտեք ինչ պետք է անել»,- ավելացրել է նա։