Քաղաքապետը կհանդիպի Սիրուշիկի հետ

«Հույսի կամուրջ» հասարակական կազմակերպությունն Էրեբունի-Երևանի տոնին ընդառաջ քաղաքապետարանի մոտ ակցիա էր կազմակերպել «Երևանը նաև իմ քաղաքն է» խորագրով։ Ակցիայի ընթացքում քաղաքապետին փոխանցվեց երկու նամակ, մեկը՝ ակցիայի մասնակիցների անունից, իսկ մյուսը՝ փոքրիկ Սիրուշիկի, ով նույնպես խնդիրներ ունի։ 

«Մենք օտար են զգում մեր քաղաքում, Երևանը մերը չէ։ Պարո՛ն քաղաքապետ, Ձեզ երբևէ չի՞ հետաքրքրել, թե ուր են մեր քաղաքի հաշմանդամություն ունեցող բնակիչները, և թե ինչու նրանց չեք հանդիպում այն վայրերում, որտեղ մյուսներին կարելի է տեսնել։ Անգնահատելի է ձեր նախաձեռնությունը Երևանում խաղահրապարակներ կառուցելու գործում, բայց երբևէ մտածե՞լ եք, թե ուր են հաշմանդամություն ունեցող երեխաները... թե՞ նրանք խաղալ չեն ուզում։

Այսօր հաշմանդամություն ունեցող մարդիկ շարունակում են մեկուսացած ապրել մեր քաղաքում»,- գրված էր քաղաքպետին ուղղված նամակում։

Lurer.com-ը այսօր զրուցեց «Հույսի կամուրջ» ՀԿ ղեկավար Սուսաննա Թադևոսյանի հետ՝ պարզելու որևէ արձագանք եղել է քաղաքապետարանից իրեն ուղղված նամակի առթիվ։

 «Ես կարծում եմ՝ հաշմանդամություն ունեցող անձանց և հաշմանդամության հարցերով զբաղվող կազմակերպությունները շատ պասիվ են գործում։ Ցավոք սրտի, ակցիայից ակցիայի շրջանակում են խնդիրները բարձրացվում, անհետևողականությունը մեր մեջ էլ կա։ Դեռ արձագանք չկա, բայց մենք ամեն մի պահ հետևողական ենք լինելու»,- ասաց Սուսաննա Թադևոսյանը և հավելեց, որ  քաղաքապետարանից հայտնել են, որ Տարոն Մարգարյանն առաջիկայում պատրաստվում է հանդիպել Սիրուշիկին՝ երկրորդ նամակի հեղինակին։

Հ.Գ Ի՞նչ կտա փոքրիկ Սիրուշիկին քաղաքապետի հետ հանդիպումը, եթե դրան չի հաջորդելու թեքահարթակների կառուցումը և Երևանում (առհասարակ Հայաստանում) հարմարեցված տրանսպորտային միջոցների առկայությունը։