Ինչո՞ւ նվազագույն աշխատավարձն ավելացավ ընդամենը 2500 դրամով (տեսանյութ)

ՀՀ ֆինանսների նախարար Վաչե Գաբրիելյանն ԱԺ քառօրյայի ժամանակ ներկայացրեց նվազագույն աշխատավարձի չափը փոփոխելու մասին նախագիծը: Նախարարի խոսքերով՝ առաջարկվում է նվազագույն ամսեկան աշխատավարձը սահմանել 35 հազար դրամ:

Լուրեր.com-ի հետ զրույցում ֆինանսների նախարարը պատասխանելով հարցին, թե արդյոք որևէ կերպ հնարավոր չէր ավելացվող 2500 դրամը փոխարինել ավելի բարձր գումարով, ասաց. «Հստակորեն կարծում եմ, որ քննարկումների ժամանակ շարադրվեց այն տեսակետը, որ մենք պետք է լինենք հեռանկարում, և կառավարությունը հեռանկարում առաջարկում է դա կրկնապատկել: Այն ամրագրված է կառավարության ծրագրում, իսկ թե ինչպես ենք գնում, դա կախված է այն հնարավորություններից, որ այս պահին ունենք և ազդեցությունից, որ մենք կթողնենք տնտեսության վրա: Անվանական առումով, խնդրում եմ չմոռանալ, որ այս ավելացումն իրականում 11 հազարից ավել է: Մենք իրականում, որպեսզի անձը վճարի 35 հազար, պետք է 46 հազար ստանա անվանական աշխատավարձ: Այս պարագայում պետք է այնպես լինի, որ Ա. ներեն բյուջեի հնարավորությունները, Բ. մենք չավելացնենք մի քանի անգամ, որը կարող է բերել գնաճային ճնշումների և Գ. պետք է այնպես լինի, որ այդ բարձրացումն անմիջապես չհարվածի այն տնտեսվարող սուբյեկտներին, որոնք ունեն աշխատողներ, որոնք վճարվում են մինիմալին շատ մոտ և եթե, ասենք, դարձնենք 60 կամ 70, նրանք ստիպված կլինեն կամ գնալ ստվեր, կամ փակել տվյալ գործարարությունը: Այդ առումով, համադրումից ելնելով, աստիճանաբար պետք է անել այդ քայլը, եթե նայեք մակրոտնտեսական այն թվերը, որ մենք ունենք. սա այն քայլն է, որին կարող ենք գնալ, իհարկե, պահելով մտքում հեռանկարը»,-ասաց Վաչե Գաբրիելյանը: