Հարսնաքարի գործով առաջինը կհարցաքննվի տուժող Արտակ Բայադյանը (տեսանյութ)

Այսօր տեղի ունեցավ Հարսնաքարի գործով հերթական դատական նիստը։ Նիստի սկզբում ներկայացվեց ապացույցների ուսումնասիրման հերթականությունը՝ տուժողների հարցաքննություն, վկաների հարցաքննություն, մեղադրյալների հարցաքննություն և փաստաթղթերի ուսումնասիրություն։ Եվ՛ տուժող, և՛ պաշտպանվող կողմերի փաստաբանները նշեցին, որ իրենց համար անհասկանալի է այսպիսի հերթականության ընտրությունը։

Մեղադրող կողմը նշեց, որ պետք է նախ հարցաքննվի տուժող Արտակ Բայադյանը, այնուհետև մյուս տուժողները, ինչին համաձայնվեց նաև տուժող կողմը։ Սակայն պաշտպանվող կողմը նշեց, որ իրենց համար անհասկանալի է դատական նիստի հետաձգումն Արտակ Բայադյանին առաջինը հարցաքննելու համար, ինչպես նաև հարցրեց, թե ինչու Արտակ Բայադյանը ներկա չէ դատական նիստին։ Տուժող կողմի փաստաբան Տիգրան Եգորյանը նշեց, որ տուժողները նշել են, որ պատրաստ են մասնակցել դատական նիստերին այն դեպքում, եթե այդ օրվա դատական գործընթացն անմիջականորեն վերաբերում է իրենց իրավունքների իրացմանն ու պաշտպանությանը, իսկ Արտակ Բայադյանը ներկա չէ, քանի որ չէին կարող կանխատեսել, որ այսօրվա դատական նիստը կսկսվի տուժողների հարցաքննությամբ։ Դատավոր Դավիթ Հարությունյանը որոշեց հարցաքննությունը սկսել Արտակ Բայադյանից և խնդրեց ապահովել նրա ներկայությունը հաջորդ դատական նիստին, ինչը բացասական ընդունեցին պաշտպանվող կողմի փաստաբանները՝ նույնիսկ «սպառնալով», որ հետագայում յուրաքանչյուր հարցաքննվողի ցուցմունքից հետո պահանջելու են մեկ օր ժամանակ հարցեր նախապատրաստելու համար։

Դատական նիստը հետաձգվեց։ Հաջորդ դատական նիստը կկայանա հոկտեմբերի 31-ին՝ ժամը 14։00-ին։