Քննարկվել են հայ-մոլդովական սոցիալական հիմնադրամի զարգացման հեռանկարները

ՀՀ փոխվարչապետ, տարածքային կառավարման նախարար Արմեն Գևորգյանն այսօր մասնակցեց ՀՀ կառավարության և Համաշխարհային բանկի նախաձեռնությամբ Երևանում մեկնարկած «Հայաստանի և Մոլդովայի սոցիալական ներդրումների հիմնադրամների զարգացման հեռանկարները» խորագրով խորհրդաժողովի բացմանը և հանդես եկավ ողջույնի խոսքով: Նա մասնավորապես նշել է, որ Հայաստանի կառավարությունը հաստատակամ է շարունակելու համագործակցությունը Համաշխարհային բանկի հետ` ակնկալելով բանկի հետագա աջակցությունը Հայաստանի սոցիալական ներդրումների հիմնադրամի զարգացման նոր, ընդլայնված օրակարգով ծրագրի մշակման և իրականացման գործում:

«Հայաստանի կառավարությունը բարձր է գնահատում ՀՍՆՀ-ի աշխատանքը և հետագա արդյունավետ գործունեության շարունակություն է ակնկալում: Հայաստանի համայնքների դեռ 60%-ը կենսական կարևորություն ունի համայնքային ենթակառուցվածքների՝ ջրամակատակարարման համակարգերի, կրթական և առողջապահական հաստատությունների, համայնքային կենտրոնների վերանորոգումը, և մենք ակնկալում ենք հիմնադրամի աջակցությունը այդ խնդիրների լուծման գործում»,-նշել է փոխվարչապետը:

Համաժողովին մասնակցում են պաշտոնյաներ Հայաստանից և Մոլդովայից, մասնագետներ Վրաստանից, Ուկրաինայից, Ռուսաստանից, տեղական իշխանությունների ներկայացուցիչներ, Համաշխարհային բանկի և այլ դոնոր կազմակերպությունների փորձագետներ: Կքննարկվեն հիմնադրամների հեռանկարների վերաբերյալ գաղափարները, կներկայացվի միջազգային և տեղական փորձը: