ԱԻՆ-ում աշխատել ցանկացող հաշմանդամների դիմումներն ընդունվելու են մինչև նոյեմբերի 20-ը

Հոկտեմբերի 24-ին «Հուսո տուն» բարեգործական կենտրոնում տեղի ունեցավ ԱՌՆԱՊ հիմնադրամի «Հաշմանդամություն ունեցող անձանց հիմնահարցերի» թեմատիկ խմբի հերթական հանդիպումը:

Աշխատանքային հանդիպմանը ներկա էին ՀՀ ԱԻՆ ՓԾ տնօրենի տեղակալ, գնդապետ Նիկոլայ Գրիգորյանը, ՀՀ ԱԻՆ ՃԿԿ պետ, գնդապետ Հովհաննես Խանգելդյանը, ԱՌՆԱՊ-ի փոխտնօրեն Արա Բարսեղյանը, ՀՀ ԱԻՆ իրավական ակտերի մշակման և փորձաքննության բաժնի պետ Խաչատուր Խաչատրյանը, Զբաղվածության պետական ծառայության ներկայացուցիչ Ցողիկ Բեժանյանը, ինչպես նաև ներկայացուցիչներ «Հույսի կամուրջ», «Սատար հաշմանդամներին» և «Լիարժեք կյանք» հասարակական կազմակերպություններից:

Հատուկ թեմատիկ խումբը ստեղծվել է հաշմանդամություն ունեցող անձանց ԱԻՆ համակարգում աշխատանքով ապահովելու խնդիրներով զբաղվելու նպատակով:

Հերթական հանդիպմանը հստակեցվեցին հաստիքների նկարագրությունն ու նվազագույն պահանջները, որոնք կներկայացվեն հաշմանդամներին՝ ՃԿԿ-ում աշխատելու համար: Մասնավորապես, որոշում կայացվեց տարիքային սահմանափակում չդնել և մշակվեց աշխատանքի ընդունվելու հայտարարության տեքստը:

Քննարկվեցին նաև հաշմանդամների կարողություններն ու աշխատանքային ունակությունները, ինչից հետո որոշում կայացվեց հաշմանդամներին ներգրավել միայն քաղաքացիական աշխատանքներին և հաշմանդամներին աշխատանքի ընդունելուց հետո նրանց ուղարկել 3-ամսյա որակավորման բարձրացման դասընթացների:

Աշխատանքի անցնելու համար դիմումներն ընդունվելու են մինչև նոյեմբերի 20-ը:

Հանդիպման ավարտին պայմանավորվածություն ձեռք բերվեց հստակեցնել աշխատանքային հանձնաժողովի կազմը, որը կհաստատվի նոյեմբերի 1-ին կայանալիք հանդիպմանը: