Անցած 7 ամիսներին ԱԻՆ ՃԿԿ-ն ստացել է 755 հազար զանգ, շտապօգնությունը՝ 490 հազար

Այսօր ՀՀ ԱԻ նախարարությունում տեղի ունեցավ Փրկարար ծառայության ղեկավար կազմի աշխատանքային քննարկում՝ Ճգնաժամային կառավարման կենտրոնի զարգացման հեռանկարների վերաբերյալ:

ՃԿԿ պետ, գնդապետ Հ. Խանգելդյանը ներկաներին հանգամանալից ներկայացրեց կենտրոնի ներկայիս աշխատանքը, հիմնական գործառույթները, տեխնիկական զինվածությունը, ծրագրային ապահովումը, ինչպես նաև առկա խնդիրներն ու զարգացման ծրագրերը: Հ. Խանգելդյանը մասնավորապես նշեց, որ շուտով կենտրոնը կունենա էներգամատակարարման 4 տարբեր, անկախ աղբյուր՝ գործունեության լիարժեք ինքնավարություն ապահովելու համար. «Նախատեսվում է ավելացնել հեռախոսային և ռադիոկայանների քանակը, համակարգչային ցանցն ապահովել հզոր հակավիրուսային պաշտպանության ծրագրերով և ժամանակակից ծրագրային փաթեթներով, զարգացնել և ընդլայնել երկրատեղեկատվական համակարգերի (GIS) կիրառությունը և սերտացնել փոխգործակցությունն ու տեղեկատվության փոխանակումը պետական մյուս գերատեսչությունների հետ»:

2012թ. առաջին 7 ամսվա ընթացքում ԱԻՆ ճգնաժամային կառավարման կենտրոնում ստացվել է շուրջ 755 հազար զանգ, որոնցից ոչ մեկն անարձագանք չի մնացել: Համեմատության համար նշենք, որ նույն ժամանակահատվածում ոստիկանությունը ստացել է մոտ 80 հազար, իսկ շտապօգնության ծառայությունը՝ մոտ 490 հազար զանգ: Այս թվերը խոսում են բնակչության կողմից ցուցաբերվող բարձր վստահության մասին, և պարտավորեցնում ավելի բարձրացնել աշխատանքի որակն ու արդյունավետությունը: Այդ նպատակով նախարարի հանձնարարությամբ՝ ճգնաժամային կառավարման կենտրոններ են ստեղծվելու նաև մարզերում, որոնք պիտի ապահովված լինեն կայուն, արագագործ ինտերնետ կապով և երկրատեղեկատվական համակարգերով:

Քննարկման ընթացքում առաջարկություն եղավ մշակել տարբեր արտակարգ իրավիճակներում գործողությունների ալգորիթմ, որպեսզի հնարավորինս կրճատվի պատահարներին արձագանքման ժամանակահատվածը:

Մյուս պետական գերատեսչությունների հետ համագործակցությունը պիտի կարգավորվի նաև իրավական ակտերով, և բոլոր պետական մարմիններից պատասխանատու, մշտական ներկայացուցիչներ պիտի լինեն ՃԿԿ նորակառույց շենքում: Անհրաժեշտ է վերանայել այլ երկրների ճգնաժամային կառավարման կենտրոնների և միջազգային կազմակերպությունների հետ համագործակցության մեխանիզմները: Կարևոր խնդիրներ են նաև ՃԿԿ աշխատակիցների ուսուցումն ու վերապատրաստումը:

ՀՀ ԱԻՆ փրկարար ծառայության տնօրեն, գեներալ-մայոր Սերգեյ Ազարյանը հանձնարարեց մշակել քննարկված հարցերը և առաջարկություններ ներկայացնել դրանց իրականացման ուղիների վերաբերյալ։