Եվրոպական ժառանգության օրերի ազգային համակարգողների համաժողով՝ Կիպրոսում

Ս. թ. հոկտեմբերի 14-16-ը Կիպրոսի Հանրապետությունում կայացել է Եվրոպական ժառանգության օրերի ազգային համակարգողների համահավաքը և Եվրոպական մշակութային ժառագությանը նվիրված 5-րդ համաժողովը, որը կրում էր «Հաղորդակցվելով մշակութային ժառանգությանը» խորագիրը: Եվրոպայի խորհրդի և Կիպրոսի Հանրապետության ներքին գործերի նախարարության կողմից կազմակերպված համահավաքին և համաժողովին ներկա էին Եվրոպական երկրների շուրջ 40 համակարգող. Հայասատանից՝ ՀՀ մշակույթի նախարարության աշխատակազմի արտաքին կապերի վարչության աշխատակից Անի Հովսեփյանը:

Եվրոպական ժառանգության օրերի ազգային համակարգողների ամենամյա հավաքի և Եվրոպական մշակութային ժառանգությանը նվիրված համաժողովի նպատակն էր ապահովել մշակութային ժառանգության ոլորտի մասնագետների փորձի փոխանակումն ու մշակութային երկխոսությունը: Այս տարի, հավաքի շրջանակում առանձին զեկույցներով ներկայացվել են մշակութային ժառանգության պահպանությանը, վերականգնմանն ու հանրահռչակմանն ուղղված լավագույն նախագծեր: Կազմակերպվել է նաև «Ժառանգությունը ամրապնդում է համայնքը» թեմայով սեմինարը, որի գերնպատակն էր հասարակության և պետական կառույցների ուշադրությունն ուղղել դեպի երկրի տնտեսության կայուն զարգացման գործում հուշարձանների անփոխարինելի դերին: Սեմինարի քննարկումների արդյունքում ընդգծվել է պատանիների և երիտասարդների համար նախատեսված ճանաչողական և կրթական ծրագրերի մշակման և ոլորտում իրականացվող որոշակի գործընթացներում նրանց գործնական մասնակցության անհրաժեշտությունը: Հոկտեմբերի 16-ին կայացել է Եվրոպական ժառանգության օրերի հանրահռչակմանը միտված նոր կայքէջի շնորհանդեսը, որի գործարկումը նախատեսվում է 2013 թ. հունվարի 14-15-ը Ստրասբուրգում՝ Եվրոպական ժառանգության օրերի ազգային համակարգողների գործնական սեմինարի շրջանակներում: