Հայերենի և հայագիտության կենտրոնն օգնում է հայապահպանմանը Սփյուռքում

Հոկտեմբերի 24-ին ՀՀ սփյուռքի նախարարությունում տեղի ունեցավ մամուլի ասուլիս, որի ընթացքում հանրությանը ներկայացվեց «Հայերենի և հայագիտության կենտրոնը»:

ՀՀ սփյուռքի նախարարության աշխատակազմի տեղեկատվության և հեռահաղորդակցության վարչության պետ Վաղինակ Վարդանյանը ներկայացրեց կենտրոնի գործունեության նպատակներն ու կարևորությունը: Կենտրոնի գործունեության առանցքում են հատկապես Սփյուռքում հայոց լեզվի պահպանմանն ու նրա ուսուցման գործընթացին օժանդակելը, օտարալեզու տեղեկությունը հայերենով մատչելի դարձնելը, հայերենով վարվող մասնագիտական ուսուցման գործընթացին աջակցելը:

2009 թվականից գործում է www.translatօr.am կայքը, որը ժամանակի ընթացքում հարստացվում ու կատարելագործվում է: Ներկայում կայքն ունի 12 գործող ծառայություն, որոնց շնորհիվ հնարավոր է արևելահայերեն-արևմտահայերեն-անգլերեն լեզուների միջև իմաստային թարգմանություններ իրականացնել, գործում է բազմալեզու թարգմանչական բացատրական բառարան, կայքի օգնությամբ հնարավոր է քերականական վերլուծությունների ենթարկել նախադասությունները, սրբագրել հայերեն տեքստերը: Կայքում գործում է ներդրված այբբենարան, հայերեն հանրագիտարան և այլ ծառայություններ:

Ասուլիսին ներկա էր կայքի հիմնադիր, տեխնիկական գիտությունների դոկտոր պրոֆեսոր Էդուարդ Մանուկյանը, ով պատասխանեց լրագրողների հարցերին: