«Մարմարա»-ի խմբագրապետը հպարտ է, որ օրաթերթը հայերենով է լույս տեսնում

Հոկտեմբերի 24-ին ՀՀ սփյուռքի նախարար Հրանուշ Հակոբյանն ընդունեց պոլսահայ գրող, հրապարակախոս, «Մարմարա» քաղաքական, հասարակական օրաթերթի գլխավոր խմբագիր, բազմաթիվ մրցանակների, այդ թվում՝ 2011թ. Սուրբ Մեսրոպ Մաշտոց շքանշանի արժանացած Ռոպէր Հատտէճեանին:

Մեծապես գնահատելով վաստակաշատ խմբագրապետի՝ ավելի քան չորս տասնամյակ Սփյուռքի ամենահին համայնքներից մեկում՝ Պոլսում օրաթերթը պահելու և նորանոր բարձունքների հասցնելու ջանքերը՝ գերատեսչության ղեկավարը նշեց, որ միայն նման անհատականությունների շնորհիվ է համայնքը ապրում և պահպանում իր հայեցի դիմագիծը:

Շնորհավորելով պարոն Հատտէճեանին լրագրողների համահայկական 6-րդ համաժողովի շրջանակներում սփյուռքյան լրատվամիջոցների մրցանակաբաշխությանը գլխավոր մրցանակին արժանանալու առթիվ՝ տիկին Հակոբյանն ընդգծեց, որ «Մարմարա»-ն հիմնադրման օրվանից իր վրա է վերցրել համայնքում մայրենի լեզվի, հայ մշակույթի պահպանման դժվարին գործը:

1967 թվականից ամբողջությամբ ստանձնելով օրաթերթը ղեկավարելու պատասխանատվությունը՝ պարոն Հատտէճեանն աննախադեպ բարձունքների է հասցրել Պոլսում հայ գրական կյանքի կազմակերպման, զարգացման և օրաթերթի միջոցով նաև Հայրենիքում և Սփյուռքի այլ համայնքներում հասանելի դարձնելու գործը:

«ՀՀ սփյուռքի նախարարության հիմնադրման առաջին իսկ օրերից «Մարմարա»-ն մեր կողքին է, ամենայն հոգատարությամբ անդրադառնում է գերատեսչության կողմից իրականացվող բոլոր հայանպաստ ծրագրերին, - նշեց ՀՀ սփյուռքի նախարարը՝ հավելելով, - մենք շատ ենք սիրում Ձեզ և պատրաստ ենք աջակցել՝ գործունեության ընթացքում առաջացած բոլոր դժվարություններին լուծումներ տալու գործում»:

Շնորհակալություն հայտնելով գերատեսչության ղեկավարին ջերմ ընդունելության և համայնքի հանդեպ ունեցած մշտառկա հոգատարության համար՝ պարոն Հատտէճեանը նշեց, որ դա է Սփյուռքում համայնքների պահպանման իրական և մեծ ազդակը:

Տիկին Հակոբյանի այն խոսքին, թե «Մարմարա»-ի ամենակարևոր առավելությունը տեղական հորդորներին տեղիք չտալը և միայն հայերեն լեզվով թերթի հրապարակումն է, խմբագրապետը հավաստիացրեց. «Ես իմ գրականութենէս ո’չ որակով կը հպարտանամ, ո’չ ալ քանակով, այլ միայն՝ լեզուով»: