Հայաստանը պատրաստակամ է Իրանի հետ խորացնելու համագործակցությունը

ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունեց Իրանի Իսլամական Հանրապետության էներգետիկայի նախարար, հայ-իրանական միջկառավարական համատեղ հանձնաժողովի համանախագահ Մաջիդ Նամջուի գլխավորած պատվիրակությանը:

Փոխվարչապետը նախ շնորհավորեց հյուրին՝ միջկառավարական հաձնաժողովի համանախագահի պարտականությունները ստանձնելու կապակցությամբ եւ վստահություն հայտնեց, որ հանձնաժողովը նույն արդյունավետությամբ կշարունակի աշխատանքները: Նա ընդգծեց, որ Հայաստանը պատրաստակամ է բարեկամ Իրանի հետ խորացնելու առեւտրատնտեսական համագործակցությունը:

Մաջիդ Նամջուն իր հերթին նշեց, որ երկու երկրների միջեւ ապրանքաշրջանառության ծավալների ավելացումը վկայում է երկկողմ հարաբերությունների աստիճանական զարգացման մասին: Նա անդրադարձավ Երեւանում այսօր մեկնարկած միջկառավարական հանձնաժողովի 11-րդ նիստի ընթացքում քննարկվող հարցերին՝ վստահություն հայտնելով, որ ընդունվելիք որոշումները կնպաստեն երկու երկրների ապրանքաշրջանառության ավելացմանը:

Կողմերը քննարկեցին երկու երկրների միջեւ էներգետիկ եւ տնտեսական ոլորտների խոշոր ծրագրերի եւ դրանց իրականացման հետ կապված հարցեր:

Փոխվարչապետը նշեց, որ բոլոր այդ ծրագրերը կառավարության ամենօրյա ուշադրության կենտրոնում են, եւ հայկական կողմը պատրաստ է ամենայն աջակցություն ցուցաբերել դրանց իրականացմանը: Զրուցակիցները մտքեր փոխանակեցին նաեւ սահմանային հատվածում գարնանային հեղեղումների հետ կապված համատեղ աշխատանքների իրականացման վերաբերյալ, անդրադարձան նաեւ երկու երկրների տարածաշրջանների միջեւ արդյունավետ համագործակցությանը: