«Առավոտ». «Ատկատային ռիսկեր». գործընթացը շարունակվում է

«Մեկ ամսից ավելի է անցել նախագահ Սերժ Սարգսյանի` կառավարությունում անցկացրած խորհրդակցությունից, որի ժամանակ նա, ի թիվս այլ խնդիրների, խոսել է նաև «ատկատների» մասին: Շատ բնական կլիներ, որ կառավարությունը հրապարակեր այս մեկ ամսում պետական պատվերների կամ գնումների համար կայացած մրցույթների արդյունքները և հայտարարեր. «Ահա այս մրցույթներն անց են կացվել բացարձակապես թափանցիկ պայմաններում, մրցույթ անցկացնողներն ու մրցույթում հաղթողներն իրար հետ որևէ կապ չունեն, և այստեղ որևէ «ատկատ» բացառվում է»: Այնքան ժամանակ, որքան նման հայտարարություն չի արվում, մենք կարող ենք ենթադրել, որ «ատկատները» շարունակվում են:

Արդեն բազմիցս ասվել է, որ մեր ամենացավոտ խնդիրն է պետական պաշտոնյաների և բիզնեսի սերտաճումը: Եթե մարդը, օրինակ, ճանապարհային ոստիկանության պետ է և միաժամանակ երթուղային գծեր ունի, կամ եթե նա բնապահպանության նախարար է և զուգահեռաբար զբաղվում է հանքային բիզնեսով, ինձ համար միանշանակ է, որ նա հարստանում է պետության, այսինքն` մեր` հարկատուներիս հաշվին: Նույնն է տեղի ունենում, եթե նախարարը մրցույթ է անցկացնում, և շինարարություն անցկացնելու իրավունքը ստանում է իր բարեկամը: Ի դեպ, այդ դեպքում շինարարության ցածր որակը գրեթե 100 տոկոսով «ապահովագրված է»:

Անշուշտ, դրական երևույթ է, որ դրա մասին խոսվում է բարձրագույն մակարդակով: Բայց անհասկանալի երևույթները դեռևս շարունակվում են: Օրինակ` իրենց եկամուտների հայտարարագրերում կառավարության անդամները, սկսած վարդապետից, նշում են, որ վերջին տարիներին ձեռք են բերել միլիոն կամ մի քանի միլիոն դոլար` սա այն դեպբում, երբ նույն կառավարությունը հերոսական ճիգերով նվազագույն աշխատավարձը բարձրացնում է 2500 դրամով:

Որքան էլ գումարում եմ վարչապետի և նախարարների աշխատավարձերը, միևնույն է` միլիոն դոլար չի ստացվում: Բայց եթե նրանք հայտարարագրում են այդ գումարները, ուրեմն, հավանաբար, կարող են դրանց համար հաշվետվություն տալ: Հետաքրքիր է` ինչպե՞ս:

Գուցե հարստանալու դեռևս չսպառված ռեսուրս են նաև Հանրապետության հրապարակում գտնվող շենքերը: ԱԳՆ-ի շենքը արդեն վաճառեցին, բայց, որքան հասկանում եմ, այսքանով կառավարությունը չի պատրաստվում սահմանափակվել: Նույն հրապարակում են գտնվում նաև տրանսպորտի և կապի նախարարությունը, բուն կառավարությունը, ինչպես նաև Ազգային պատկերասրահը, և պաշտոնյաները հայտարարում են, որ շահավետ առաջարկների դեպքում այս շենքերը նույնպես կվաճառվեն: Դե, իսկ որ նման առաջարկներ կլինեն, կարելի է չկասկածել: Այդ առևտուրն, անշուշտ, իր մեջ նույնպես պարունակում է «ատկատային ռիսկեր»»,– «Առավոտ»–ի այսօրվա համարում գրել է Արամ Աբրահամյանը: