Նիկոլ Փաշինյան. Իշխանությունն ապաքաղաքականացնում է քաղաքականությունը (տեսանյութ)

Կառավարությունն օրեր առաջ իր բացասական եզրակացությունը տվեց ՀՅԴ պատգամավորիների կողմից ներկայացված օրենսդրական նախաձեռնությանը, որով առաջարկվում էր Ազգային ժողովի ընտրություններն անցկացնել 100 տոկոս համամասնական ընտրակարգով:

«Հայ ազգային կոնգրես» խորհրդարանական խմբակցության պատգամավոր Նիկոլ Փաշինյանը Lurer.com-ի հետ զրույցում, պատասխանելով հարցին, թե ըստ իրեն որն է պատճառը, որ իշխանությունը չի ցանկանում անցնել 100 տոկոս համամասնական ընտրակարգին, ասաց. «Ազգային ժողովի դահլիճին նայե՛ք և կտեսնեք պատճառը: Կիսադատարկ դահլիճ, որը գալիս է այն ժամանակ, երբ հարկավոր է քվեարկել, ընդ որում՝ կողմ քվեարկել: Այսինքն՝ մեծամասնական ընտրակարգն իր ամբողջ պրոցեսով իշխանությանը հնարավորություն է տալիս վերահսկելի պահել ԱԺ-ն և ըստ էության, ընտրությունների ժամանակ ուրիշի ձեռքերով շագանակներ հանել կրակից, տվյալ դեպքում՝ մեծամասնական թեկնածուների: Եվ եթե խոսում ենք ընտրական և քաղաքական կոռուպցիայի մասին, կտեսնեք հիմնական մեղադրանքները, ահազանգերը, որոնք կապված են ընտրությունների հետ, այդ մեխանիզմը գործում է հիմնականում իշխանական մեծամասնական թեկնածուների և հետագայում պատգամավորների միջոցով»,-ասաց Փաշինյանը:

Վերջինիս խոսքերով՝ իշխանությունը մի շատ հետաքրքրիր կարգախոս ու բանաձև ունի. «Ինչի մասին խոսում ենք, ասում են չքաղաքականացնեք, իրենք այնքան են ապաքաղաքականացրել քաղաքականությունը, որ այդ մեծամասնական ընտրակարգը վերջին միջոցներից է, որ նրանց հնարավորություն է տալիս ընտրությունն ապաքաղաքականացնել: Այսինքն՝ ընտրությունը, որն իր էությամբ քաղաքական երևույթ է, այդ միջոցով իշխանությունը ապաքաղաքականցնում է, և դրա հետևանքները մենք արդեն ունենք արդեն շատ տարիներ, մասնավորապես Ազգային ժողովում՝ որպես հետևանք կառավարության գործունեության մեջ և այդպես շարունակ»,-նշեց ՀԱԿ պատգամավորը:

Ազատուհի Արասխանյան