Լիբիայում իշխանամետ ուժերն ամբողջովին ազատագրել են Բանի Վալիդ քաղաքը
Վերջին լուրեր
Մի քանի շաբաթ տևած դաժան մարտերի արդյունքում լիբիական Բանի Վալիդ քաղաքն անցել է իշխանամետ ուժերի լիակատար վերահսկողության տակ. հաղորդում է euronews-ը: Նշենք, որ այս բնակավայրի համար ընթացող մարտերում ուժեղ էին նախկին նախագահ Մուամար Քադաֆիի կողմնակիցների դիրքերը, սակայն քաղաքի շրջափակումից և ինտենսիվ հրետանային ռմբակոծությունից հետո նրանք հանձնվեցին: «Մենք կեսօրին լիովին ազատագրեցինք Բանի Վալիդը քադաֆիականներից, ամբողջ քաղաքը մաքրվել է նրանցից»,-ասում է կառավարական բանակի զինվորներից մեկը:
Պաշարման և բախումների ընթացքում երկու կողմերից էլ սպանվել են տասնյակ մարդիկ, մի քանի հարյուրը վիրավոր են: Հայտնի է, որ Բանի Վալիդը երկար ժամանակ հանդիսանում էր Քադաֆիի կողմնակիցների ապաստարանը. այս քաղաքի բնակիչներն անցյալ տարի ամենաերկարը դիմադրեցին ապստամբների հարձակմանը:
«Մեր նպատակն էր ազատագրել և վերականգնել կարգուկանոնը Բանի Վալիդում, որպեսզի բնակիչները կարողանան վերադառնալ: Այժմ մենք վերադարձնում ենք քաղաքը ներքին գործերի նախարարության հսկողության տակ և լքում ենք այն»,-նշում է կառավարական զորքերի հրամանատարներից մեկը:
Ըստ դիտորդների՝ վերջին իրադարձությունները ցուցադրեցին Լիբիայի կենտրոնական կառավարության թուլությունը, որը դեռ միայն միասնության հույս է փայփայում Քադաֆիի ռեժիմի տապալումից հետո:
ՈՒՂԻՂ ԵԹԵՐ
Ամենադիտված 
Դիրքում բռնшբшրnւթյшն դեպքը տեսած, ապա սպшնված 3 զինվորների ծնողներն արդարադատություն են պահանջում (տեսանյութ)
