Forbes-ը հրապարակել է ամենահարուստ մահացած հայտնիների ցուցակը

Լեգենդար Էլիզաբեթ Թեյլորը գլխավորել է հայտնիների ցուցակը, որոնց եկամուտը նույնիսկ մահից հետո շարունակում է գերազանցել տասնյակ և նույնիսկ հարյուրավոր միլիոն դոլարների սահմանը: Վարկանշային աղյուսակը կազմել է ամերիկյան Forbes ամսագիրը:

«Հոլիվուդի թագուհու» ժառանգները նույնիսկ նրա մահից հեոտ նրա անունից վաստակել են 210 մլն դոլար: Թեյլորը մահացել է 2011թ. մարտին 79 տարեկան հասակում. հիշեցնում է ИТАР-ТАСС-ը:

Դերասանուհուն հետմահու մեծ եկամուտներ է բերել նրա զարդերի և զգեստների հավաքածուների վաճառքը:

Վարկանշային աղյուսակի երկրորդ հորիզոնականը զբաղեցնում է փոփ երաժշտության արքա Մայքլ Ջեքսոնը, ով մահացել է 2009-ին: Նրա եկամուտը 2011թ. ընթացքում կազմել է 1445 մլն դոլար: Փորձագետները կարծում են, որ հաջորդ տարի Ջեքսոնը կվերադարձնի առաջատարի դիրքերը, քանի որ նրա սկավառակները շարունակում են հաջողությամբ վաճառվել:

Մահացած հռչակավորների ցուցակի երրորդ տեղում է ռոքնռոլի արքա Էլվիս Փրեսլին, ով մահացել է 1977թ.: Նրա հաշվին կա 55 մլն դոլար: Նրա մահից 28 տարի անց երկրպագուները շարունակում են գնել վերջինիս ձայնասկավառակները:

4-րդ հորիզոնականում է ամերիկացի ծաղրանկարիչ Չարլզ Շուլցը: Նրա եկամուտը կազմում է 37 մլն դոլար:

Հնգյակը եզրափակում է լեգենդար երաժիշտ Բոբ Մարլին՝ 17 մլն դոլար եկամուտով:

Վարկանշային աղյուսակում հայտնվել են հիմնականում երաժիշտները, ընդ որում, ֆիզիկոս Ալբերտ Էյնշտեյնը կիսում է 7-րդ հորիզոնականը Մերլին Մոնրոյի հետ: Նրանք «աշխատել են» 10 մլն. դոլար: