Մենք չենք կարող մեր որոշումները Հայաստանի և Ադրբեջանի վզին փաթաթել. ԵԱՀԿ

Ղարաբաղյան հիմնախնդրի կարգավորման հարցում ԵԱՀԿ-ին բաժին է ընկել առաքելությունը՝ ստեղծել պայմաններ ինչպես տեղերում, այնպես էլ քաղաքական հարթակներում, որպեսզի կողմերն աշխատեն հակամարտության կարգավորման վրա: Այս մասին հայտարարել է ԵԱՀԿ գլխավոր քարտուղար Լամբերտո Զանյերը Голос России-ին տված հարցազրուցի ժամանակ:

Ինչպես նա նշել է, ԵԱՀԿ Մինսկի խումբն այն գործիքն է, որը ստեղծել է Կազմակերպությունը և ներկայացրել վիճաբանող կողմերի հայեցողությանը: Քարտուղարը նշել է, որ Մինսկի խումբն արդեն երկար տարիներ է, ինչ Հայաստանին և Ադրբեջանին առաջարկում է լուծման տարբերակներ և «ինչ-որ պահի նույնիսկ թվում էր, թե հակամարտության կարգավորման հիմնական սկզբունքների շուրջ համաձայնությունն արդեն ձեռք է բերվում: Սակայն ինչ-ինչ պատճառներով կողմերը դարձյալ շարունակում են մեղադրել միմյանց: Որոշակի սահման գոյություն ունի, որից այն կողմ ԵԱՀԿ-ն ոչինչ անել չի կարող: Մենք չենք կարող մեր որոշումները Հայաստանի և Ադրբեջանի վզին փաթաթել, նրանք ինքնուրույն պիտի համաձայնության գան իրար մեջ: Մենք միայն անում ենք հնարավոր ամեն բան՝ դրա համար պայմաններ ստեղծելու նպատակով: Լեռնային Ղարաբաղի հիմնախնդրի կարգավորման բարդությունն այն է, որ մեր տարբեր առաջարկությունները ամենատարբեր պատճառներով մերժում են ստանում կողմերից որևէ մեկի կողմից»,-հայտարարել է ԵԱՀԿ գլխավոր քարտուղարը: