Ինչ են խոսելու Նալբանդյանն ու Մամեդյարովը. ՀՀ փոխարտգործնախարար

ՀՀ փոխարտգործնախարար Շավարշ Քոչարյանը, խոսելով Նալբանդյան-Մամեդյարով հավանական հանդիպման մասին, FM 107-ին տված հարցազրույցում մասնավորապես ասել է.

«Ադրբեջանցիներն առաջնորդվում են գեբելսյան սկզբունքով՝ որքան սուտը հրեշավոր է և որքան շատ են կրկնում այդ սուտը, այնքան մարդիկ ավելի շատ են հավատում, հասկանալի է, որ դա պահանջում է հակազդեցություն. մեր կողմից հակազդեցությունն ակներև է, սակայն դա ավելի ակտիվ կերպով է պետք անել ոչ միայն ԱԳՆ-ի միջոցով, այլև մեր սփյուռքի, մտավորականների, գրքերի ու բրոշուրների միջոցով, այսինքն՝ պետք է ավելի մեծ ակտիվություն ցուցաբերել ադրբեջանական ստի քարոզչամեքենան լռեցնելու համար»։

Խոսելով Նալբանդյան-Մամեդյարով կայանալիք հանդիպման մասին՝ ՀՀ փոխարտգործնախարարը նշել է. «Պատահական չէր, որ մինչև Սաֆարովի զարհուրելի դեպքը նախատեսված էր մեր արտգործնախարարի եռանախագահների հետ հանդիպում, և բնական է, որ այդ հանդիպմանը քննարկվել էր միայն այս հարցը։ Եվ եթե տեղի ունենա Նալբանդյան-Մամեդյարով հանդիպումը, ապա առաջին հերթին քննարկվելու են դրա վնասները և այն, թե ինչպես պետք է դուրս գալ ստեղծված վիճակից։ Սա է լինելու հիմնական թեման։ Այսինքն՝ հանդիպել այնպես, իբր ոչ մի բան տեղի չի ունեցել և շարունակել բանակցությունները, դա անհնար է, բացառվում է։ Այն, ինչը տեսանելի էր հայկական կողմերի՝ թե՛ Հայաստանի Հանրապետության, թե՛ ԼՂՀ-ի համար դարձավ լիարժեք, ավելի տեսանելի այն, որ Ադրբեջանը մի պետություն է, որն իր իսկ կողմից ստանձնած պարտավորություններն է խախտում, գործում է միջազգային իրավունքի դեմ և առաջնորդվում միջնադարյան մտածելակերպով, սա արդեն գնալով դառնում է ավելի ակնհայտ և պատահական չէ, որ այդ զարհուրելի դեպքից հետո արդեն համատարած մի բան հստակ է։ Այդքանից հետո դա զավեշտ է, որ Ադրբեջանը դեռ խոսում է Ղարաբաղը որևէ կարգավիճակով իր կազմ վերադարձնելու մասին, այդտեղ արդեն բարոյական տաբու է առաջացել, բացառվում է»։