Սյունիքի մարզպետը չի՞ հայհոյել Գագիկ Ծառուկյանին. Մարզպետը պարզաբանում է

«Այն, որ առանձին լրագրողներ կամ առանձին լրատվամիջոցներ ինչ-ինչ պատճառով իրականությունը կամ ասված խոսքը կարող են խեղաթյուրել, կամ էլ չեղած տեղը իրադարձություններ մոգոնել, նորություն չէ: Գոնե ինձ համար: Եվ միշտ չէ, որ հարկ եմ համարել անդրադառնալ հանիրավի մեղադրանքներին կամ որպես ճշմարտություն ներկայացվող ասեկոսներին:

Բայց ամեն ինչ սահման ունի:

«Ժողովուրդ»-ի «Սյունիքի մարզպետը հայհոյե՞լ է Գագիկ Ծառուկյանին» հաղորդագրությունը, իմ համոզմամբ, դուրս է լրատվական էթիկայի, մասնագիտական տարրական պատասխանատվության ու պարկեշտության սահմաններից: Եթե մեղմ բնութագրեմ տպագրվածը, ապա այն լկտի սուտ է, արհեստականորեն մարդկային հարաբերություններ սրելու փորձ և թերևս էժանագին քաղաքական հնարքներ բանեցնելու հետին նպատակներ հետապնդող ինչ որ անբարո անձի մտախավարման արդյունք»,– այս մասին տեղեկացնում է ՀՀ Սյունիքի մարզպետարանի աշխատակազմի տեղեկատվության և հասարակայնության հետ կապերի բաժինը:

Հիշեցնենք, որ «Ժողովուրդ» օրաթերթը գրել էր. որ իր տեղեկությւոններով՝ նախօրեին Սյունիքի մարզպետ Սուրեն Խաչատրյանը կրկին ժողով է հրավիրել, որի ընթացքում խիստ բարկացած տոնով ասել է, թե ԲՀԿ առաջնորդ Գագիկ Ծառուկյանը, մնացած այլ պաշտոններից բացի, պահանջում է նաև Սյունիքի մարզպետի պորտֆելը։ Նա այնքան զայրացած է եղել, որ անգամ հայհոյել է։ Ժողովին ներկա աշխատակիցները վատ վիճակում են հայտնվել մարզպետի պահվածքից, որի հետ երեկ այդպես էլ չկարողացանք զրուցել։