Կառավարությունից կրկին բողոքում են (տեսանյութ)

Կառավարության շենքի դիմաց այսօր կրկին ցուցարարները շատ էին: Բանակում խաղաղ պայմաններում զոհված զինծառայողների մայրերը, Արամի փողոցի բնակիչները, «Բանակն իրականում» նախաձեռնության անդամները, անհատ քաղաքացիներ, ներկայացնում էին իրենց բողոքը՝ ուղղված Կառավարությանը։

Lurer.com-ը զրուցեց «Հայէլեկտրո» գործարանի շենքում ապրող բնակիչների հետ, ովքեր ևս ներկա էին այնտեղ։ Ըստ ցուցարարների՝ շենքի հետ բուժարանն աճուրդի է հանվել ՊԵԿ-ին ունեցած պարտքերի պատճառով։ Գործարանի այդ շենքում ապրող 62 ընտանիք պատշաճ կերպով չի տեղեկացվել։ Այսօր նրանք կառավարության դիմաց պահանջում էին չզրկել իրենց տանիքից։

Կոտայքի մարզի մի բնակիչ, ով նույնպես իր բողոքն էր հայտնում, Lurer.com-ի հետ զրույցում ասաց. «Ես բողոքում եմ Կոտայքի մարզի մարզպետ Կավալենկո Շահգելդյանի դեմ։ 1988թ. երկրաշարժի տուժած եմ, սակայն Կավալենկոն արխիվը վերացրել է և չի ցանկանում բնակարանի հարցում ինձ օգնել»,-ասաց վերջինս։

Ինչպես միշտ, իրենց ամենշաբաթյա ակցիան էին անցկացնում խաղաղ պայմաններում զոհված զինծառայողների մայրերը, ովքեր նույն պահանջն ունեին Կառավարությունից՝ բացահայտել և պատասխանատվության ենթարկել իրենց որդիների սպանության իրական մեղավորներին։

Մանրամասներն առաջարկում ենք դիտել տեսանյութում.