Հայկական բանկերը ՓՄՁ ֆինանսավորման համար աջակցություն են ստանում

ԱՄՆ Միջազգային Զարգացման Գրասենյակի (ՄԶԳ) կողմից ֆինանսավորվող Ձեռնարկությունների զարգացման և շուկայի մրցունակության ծրագիրը այս տարվա հոկտեմբերի 24-ին կազմակերպել էր Նոր հնարավորություններ փոքր բիզնեսի ֆինանսավորման համար խորագրով միջոցառումը:

Միջոցառմանը ներկա էին ծրագրի գործընկեր ֆինանսական հաստատությունները, ինչպես նաև ՀՀ կառավարության և Հայաստանում միջազգային կազմակերպությունների ներկայացուցիչներ:

Մասնակիցները քննարկել են մի շարք հարցեր, այդ թվում` փոքր և միջին ձեռնարկությունների ֆինանսական հասանելիության բարձրացման նպատակով ֆինանսական ոլորտի ներուժի հզորացումը, հաճախորդների ֆինանսական իրազեկման բարձրացումը, ինչպես նաև մոտ ապագայում փոքր և միջին ձեռնարկությունների կողմից ինովացիոն վարկային պրոդուկտներից օգտվելու նոր հնարավորությունները:

ԱՄՆ ՄԶԳ/Հայաստան առաքելության տնօրենի ժամանակավոր պաշտոնակատար Քոնան Փեյսենը և ՀՀ ԿԲ փոխնախագահ Ներսես Երիցյանը ելույթ են ունեցել` շեշտելով ՓՄՁ-ներին տրամադրվող աջակցության կարևորությունը Հայաստանում նորարարության և տնտեսական զարգացման խթանման գործում:

Միջոցառման վերջում գործընկեր ֆինանսական հաստատությունների շուրջ 60 վարկային մասնագետներին և վերլուծաբաններին հանձնվեցին վկայագրեր «Ի-Դի-Էմ-Սի» ծրագրի կողմից կազմակերպված «Ֆինանսական վերլուծություն» թեմայով դասընթացը հաջող ավարտելու կապակցությամբ:

2011թ.-ին մեկնարկից ի վեր, Ի-Դի-Էմ-Սի ծրագիրը տրամադրում է տեխնիկական աջակցություն գործընկեր ֆինանսական հաստատություններին` ծրագրի թիրախային ոլորտներում գործունեություն ծավալող ՓՄՁ-ներին տրամադրվող վարկային ծառայությունների բարելավման և առկա բացերի հաղթահարման նպատակով, այդ թվում` նոր ֆինանասական պրոդուկտների մշակումը, ռիսկերի կառավարումը, հաճախորդների իրազեկումը և վարկային վերլուծության գործընթացի արդյունավետության բարձրացումը: