Հաշմանդամ կանանց ու աղջիկների նկատմամբ բռնության կանխարգելման թեմայով քննարկում ՄԱԿ-ում

Հոկտեմբերի 23-ին ՄԱԿ-ի կենտրոնակայանում կայացավ հաշմանդամություն ունեցող կանանց նկատմամբ բռնության կանխարգելման ու վերացման թեմայով հանդիպում, որի նպատակն էր վերհանել բռնարարքների պատճառներն ու հետևանքները' քննարկելով ազգային ու միջազգային մակարդակներում ռազմավարություն եւ քաղաքականություն մշակելու անհրաժեշտությունը:

ՄԱԿ-ում ՀՀ մշտական ներկայացուցչության համահեղինակությամբ տեղի ունեցած այս հանդիպմանը մասնակցեցին ու ելույթներով հանդես եկան ՄԱԿ-ի գլխավոր քարտուղարի տնտեսական զարգացման հարցերով օգնականը, ՄԱԿ-ի կանանց հարցերով գործադիր տնօրենի տեղակալը, Գլխավոր քարտուղարի Կանանց հանդեպ բռնությունների հարցերով հատուկ զեկուցողը, կազմակերպության սոցիալական եւ տնտեսական հարցերի դեպարտամենտի, Սոցիալական քաղաքականության ու զարգացման ստորաբաժանման, անդամ երկրների ու հասարական կազմակերպությունների ներկայացուցիչները:

ՄԱԿ-ում ՀՀ դեսպան Կարեն Նազարյանն իր ելույթում հույս հայտնեց, որ քննարկումները եւ առաջարկությունները կնպաստեն 2013թ. սեպտեմբերին Նյու Յորքում կայանալիք Հաշմանդամության եւ զարգացման ՄԱԿ-ի բարձր մակարդակի հանդիպման նախապատրաստմանը: ՀՀ դեսպանն ընդգծեց, որ Կոպենհագենի սոցիալական զարգացման համաշխարհային համաժողովը սոցիալական ինտեգրումը բնորոշել է «հասարակություն բոլորի համար, ուր անհատն ունի իրավունքներ, պատասխանատվություն եւ ակտիվ դերակատարում»: Դեսպան Նազարյանը խոսեց նաեւ Հայաստանի սոցիալական քաղաքականության մարտահրավերների եւ առաջնայնությունների մասին, ներկայացրեց ՀՀ կառավարության կողմից իրականացվող ծրագրերն՝ ուղղված ազգաբնակչության խոցելի հատվածի հիմնախնդիրների լուծմանը եւ աղքատության հաղթահարմանը, որոնք բխում են նաև դեռևս 2010թ. Հայաստանի կողմից վավերացրած ՄԱԿ-ի հաշմանդամություն ունեցող անձանց իրավունքների մասին դաշնագրից:

Հանդիպման մասնակիցների թվում էր Կարինե Գրիգորյանը, ով 2007թ. Գյումրիում հիմնադրել էր հատուկ կարիքներ ունեցող կանանց «Ագաթ» կենտրոնը: Որպես հիմնական զեկուցողներից մեկը՝ նա ներկայացրեց Հայաստանում իր ղեկավարած հասարակական կազմակերպության գործունեությունը, խոսեց հաշմանդամ կանանց պաշտպանության եւ այդ ուղղությամբ կենտրոնի կողմից ձեռնարկած քայլերի մասին: