Ամփոփվեցին ԱԷՄԳ-ի փորձագիտական խմբի աշխատանքները

Հոկտեմբերի 25-ին ՀՀ ԱԻ նախարարության նիստերի դահլիճում տեղի ունեցավ Ատոմային էներգիայի միջազգային գործակալության (ԱԷՄԳ) փորձագետների կողմից միջուկային նյութերի կամ ռադիոակտիվ վարակվածության հայտնաբերման և ՀԱԷԿ-ի վթարային հակազդման միջոցառումների ուսումնասիրման աշխատանքների ամփոփումը:

Ինն օր շարունակ ԱԷՄԳ-ի փորձագիտական խումբը Հայաստանում անկախ դիտարկում էր անցկացնում ՀՀ-ում միջուկային կամ ճառագայթային վթարների դեպքում արձագանքման պատրաստվածության վերաբերյալ: Նպատակը՝ դիտարկման ընթացքում թերություններ հայտնաբերելու դեպքում, երկրին համապատասխան օգնություն տրամադրելն էր և առաջարկություններով ու մասնագիտական խորհուրդներով հանդես գալն էր:

Այսօրվա հանդիպմանը մասնակցում էին ԱԷՄԳ միջազգային փորձագիտական խումբը (EPREV), ներկայացուցիչներ ՀՀ արտակարգ իրավիճակների և պաշտպանության, էներգետիկայի և բնական պաշարների, առողջապահության, գյուղատնտեսության, տրանսպորտի և կապի, բնապահպանության և էկոնոմիկայի նախարարություններից, ոստիկանությունից և ՀՀ կառավարությանն առընթեր միջուկային անվտանգության պետական կոմիտեից:

ԱԷՄԳ-ի փորձագիտական խմբի ղեկավար Լարիսա Ռոզդիալովսկայան իր ելույթի ընթացքում ներկայացրեց փրձագիտական խմբի մասնագիտական գնահատականն ու ներկայացրեց իրենց կազմած զեկույցը՝ ՀՀ-ում միջուկային կամ ճառագայթային վթարների դեպքում արձագանքման պատրաստվածության վերաբերյալ։ Իր ելույթում նա մասնավորապես ասաց. «Ես Հայաստանից շատ դրական տպավորություններ ստացա: Ձեր երկրում արագ արձագանքման համակարգը շատ լավ և արդյունավետ է գործում և կարող է մի շարք երկրների համար օրինակ ծառայել: Մենք համոզվեցինք, որ ՀՀ կառավարությունը և, մասնավորապես, ԱԻ նախարարությունը մեծ աշխատանք են կատարել այս ոլորտում՝ միջազգային նորմերին հասնելու համար: Իհարկե, անելիքներ դեռ կան, բայց ձեր գործող համակարգն ու դրա կատարելագործման շուրջ տարվող աշխատանքները մենք շատ բարձր ենք գնահատում»:

Հավելելով Լ. Ռազդիլովսկայային՝ փորձագիտական խմբի անդամ Գեզա Մաչուգան նշեց. «Մենք 9 օրվա ընթացքում 16 հանդիպում ենք ունեցել՝ 100-ից ավելի փորձագետների հետ, և վստահորեն կարող ենք ասել, որ Հայաստանում միջուկային կամ ճառագայթային վթարների դեպքում արձագանքման համակարգը, իրոք, շատ հուսալի է գործում»:

Հանդիպման վերջում պայմանավորվածություն ձեռք բերվեց շարունակել համագործակցությունը ՀՀ ԱԻՆ և ԱէՄԳ փորձագիտական խմբի միջև: