300 մասնակից՝ 3 ամսվա ընթացքում

Շուրջ 300 մաքսային ծառայողներ արդեն կատարելագործել են մասնագիտական հմտությունները ՊԵԿ ուսումնական կենտրոնում: Հուլիսի 24-ից գործող կենտրոնի մաքսային մասնաճյուղում համակարգի աշխատակիցների համար հատուկ դասընթացներ են անցկացնում ինչպես ՊԵԿ վերադաս մարմնի, այնպես էլ արտերկրից հրավիրված մասնագետները: ԵՄ «Թվինինգ» ծրագրի փորձագետները երկարատև համագործակցություն են սկսել ՊԵԿ-ի հետ՝ մաքսային ընթացակարգերի ուսումնասիրման, պարզեցման և մաքսային ծառայողների աշխատանքային որակը բարելավելու ուղղությամբ: Մաքսային մասով ուսումնական միջոցառումների պատասխանատու Միրա Քալանթարի փոխանցմամբ ուսումնական կենտրոնի ստեղծումից ի վեր այստեղ պարբերաբար դասախոսում են Համաշխարհային մաքսային կազմակերպության (ՀՄԿ) անդամ պետությունների մասնագետները: Իսկ վերջերս Անգլիայից և Դանիայից հրավիրված հյուրերը եռօրյա սեմինար են անցկացրել՝ մտավոր սեփականության վերաբերյալ:

Միրա Քալանթարը նկատում է, որ ուսումնական կենտրոնի տեխնիկական հագեցվածության շնորհիվ մաքսային ծառայողները ստանում են տեսական և գործնական գիտելիքներ, որոնք անհրաժեշտ են իրենց ամենօրյա աշխատանքում: Քանի որ մաքսակետերի աշխատակիցներն առնչվում են օտարերկրացիների հետ ևս, ուսումնական կենտրոնում դասավանդում են նաև մասնագիտական տերմինաբանությամբ անգլերեն և ռուսերեն:

Նոյեմբերից կենտրոնում մեկնարկելու է կրթական ևս մեկ նախագիծ, որը նպաստելու է Հայաստանում հարկային միջնորդի ինստիտուտի զարգացմանը: Իսկ մոտ ապագայում հատուկ սարքավորումներով զինված սրահներում մասնակիցները կկարողանան գործնականում դիտարկել բոլոր այն իրավիճակները, որոնցում հայտնվում են մաքսակետերի ծառայողներն իրենց ամենօրյա աշխատանքում: