Թե ով էր կտրել մատը` որպես բողոքի նշան

Արդարադատության նախարարության ՔԿՀ լրատվության ծառայությունը քիչ առաջ հաղորդագրություն տարածեց այսօր լրատվամիջոցներին իրենց բողոքն ուղարկած դատապարտյալների մասին, որոնք հացադուլ են հայտարարել իրենց դեմ ընդունված վճռի դեմ։ Նրանցից մեկը մատը կտրել և նամակի հետ ուղարկել էր ԶԼՄ-ներին:

Պաշտոնական հաղորդագրության համաձայն՝ նամակի հեղինակը նախկինում երկու անգամ դատապարտված, «Նուբարաշեն» ՔԿՀ կալանավոր Արթուր Խաչատրյանն է (մեղադրվում է ՀՀ քրեական օրենսգրքի 132հ. 1-ին (մարդու թրաֆիքինգը) և 182հ. 1-ին մասի (շորթում) հատկանիշներով), ով հոկտեմբերի 22-ին, ժամը 18:00-ին հայտարարել է հացադուլ: Նրա հետ հացադուլ են սկսել նաև կալանավոր Վարդան Դեմիրճյանը (մեղադրվում է ՀՀ քրեական օրենսգրքի 34-104հ. 2-րդ մասի 1 և 6 կետերով (սպանության փորձ), 185հ. 3-րդ (գույքը դիտավորությամբ ոչնչացնելը կամ վնասելը, որն առանձնապես խոշոր չափերի վնաս է պատճառել) և 325հ. 1-ին մասի (պաշտոնական փաստաթուղթ կեղծելը) հատկանիշներով) և դատապարտյալ Կարեն Թառոյանը (2005թ. մայիսի 29-ին ՀՀ քրեական օրենսգրքի 112հ. 2-րդ մասի 14 կետով (դիտավորությամբ առողջությանը ծանր վնաս պատճառելը, որն անզգուշությամբ առաջացրել է տուժողի մահ) 9 տարվա ազատազրկման է դատապարտվել):

Թառոյանը անհիմն պահանջներ է ներկայացրել, բայց չի սպասել դրանց քննությանը և կատարել է ինքնավնասում՝ կտրելով աջ ձեռքի ճկույթի միջին հատվածը:

«Հավելենք, որ Կ. Թառոյանը գտնվելով «Նուբարաշեն», «Սևան», «Արթիկ», «Գորիս», «Վանաձոր» և «Հրազդան» քրեակատարողական հիմնարկներում, դրսևորել է ագրեսիվ վարքագիծ, խիստ բացասական է բնութագրվել և ընդհանուր առմամբ 20 անգամ ենթարկվել է կարգապահական տույժերի: Ավելին, ամիսներ առաջ, պատճառաբանելով մոր և կնոջ լարված հարաբերությունները, կտրել էր ձախ ձեռքի ճկույթի միջին հատվածը»,- նշված է հաղորդագրության մեջ: