Բալասանյանը պարտք է նաեւ Սպարտակ Ղուկասյանի՞ն

Գյումրու քաղաքապետարանը պաշտոնական նամակներ է ստացել շուրջ մեկ տասնյակ ընկերություններից, որոնք հանդես են եկել պարտքերի պահանջով: Այս մասին ԳԱԼԱ-ին փոխանցել է Գյումրու քաղաքապետարանի մամլո խոսնակ Զոհրապ Եգանյանը: Ըստ Եգանյանի, դրանք տարբեր ընկերություններ են'շինարարական, ինչպես նաեւ ծառայություններ մատուցող ընկերություններ: Եթե Գյումրիի քաղաքապետարանը պարտքերը չմարի, ենթադրելի է, որ այդ ընկերությունները կմտնեն դատարան:

«Առայժմ այդ ընկերություններից ոչ մեկը դատարան մտնելու մասին քաղաքապետարանին ակնարկներ չի արել, բայց ոչ մի բան բացառված չէ: Այսինքն, նրանք ունեն լիիրավ իրավունքներ դատարան մտնելու»,-ասաց Եգանյանը: Ըստ նրա, Գյումրու քաղաքապետարանի ընդհանուր պարտքը կազմում է շուրջ 1.2 մլրդ դրամ, գերակշռող մասը պարտքեր են ընկերություններին ու մատուցված ծառայությունների դիմաց չվճարված գումարներն են: «Միայն «Գյումրեցի ընկերներ» ՍՊԸ-ն հանդես է եկել 420 միլիոն դրամի պահանջով, բոլորից շատ պարտք այս ընկերությանն ունի Գյումրու քաղաքապետարանը»,-մանրամասնեց Եգանյանը:

Նշենք, որ այս ընկերությունը Գյումրու փողոցներն ասֆալտապատող ընկերությունն է եւ կապվում է Գյումրու նախկին քաղաքապետ Վարդան Ղուկասյանի որդու՝ Սպարտակ Ղուկասյանի անվան հետ: «Ես էլ խոսակցական մակարդակով նման բաներ իմացել եմ, բայց պաշտոնապես ոչինչ հայտնի չէ այս մասին»,-ասաց Զոհրապ Եգանյանը:

Նշենք, որ Գյումրու քաղաքապետարանը ներկա պահին այդ պարտքերը փակելու հնարավորություն չունի:

Աղբյուրը՝ galatv.am