ՕԵԿ-ի բազմացման երաշխիքը

«Օրինաց երկիր» կուսակցության նախագահ, համատեղության կարգով ՀՀ Ազգային անվտանգության խորհրդի քարտուղար Արթուր Բաղդասարյանը մի նոր, վճռական քայլ է կատարել կուսակցաշինության գործում: Ինչպես հայտնի է, Բաղդասարյանի ղեկավարած քաղաքական ուժն արդեն տևական ժամանակ զբաղված է «շինարարական աշխատանքներով»՝ կուսակցաշինությամբ, սակայն ջանքերը, որքան էլ որ եռանդուն, այնուամենայնիվ, այդքան էլ ցանկալի արդյունք չապահովեցին վերջին խորհրդարանական ընտրություններում: 170 000 անդամ ունեցող կուսակցությանը ձայն տվեց ընդամենը 83 123 հոգի: Եվ ահա, ինչպես հաղորդում է Ազգային անվտանգության խորհրդի լրատվական ծառայությունը, Չինաստանի Ժողովրդական Հանրապետությունում գտնվող ԱԱԽ-ի քարտուղարը որոշել է իր այս պաշտոնական այցելությունից առավելագույն օգուտ քաղել: Ի պաշտոնե հանդիպելով այդ երկիրը կառավարող կուսակցության՝ Չինաստանի կոմունիստական կուսակցության անդամ Չեն Ֆենսյանի հետ՝ Բաղդասարյանը հաջողացրել է ՀՀԿ-ի և ՕԵԿ-ի կողմից Հայաստան այցելության հրավերները փոխանցելու հետ, միաժամանակ հատուկ իր կուսակցության՝ ՕԵԿ-ի համար մի նոր, կանաչ լույս վառել. պաշտոնապես հայտարարվել է, որ ՕԵԿ-ի և ՉԿԿ-ի միջև միջկուսակցական համագործակցություն է հաստատվել:

Սա, հիրավի, մի նոր էջ կարող է բացել այս կուսակցության վերելքի համար: Մի բան է ԵԺԿ անդամակցությունը, մեկ այլ բան՝ ՉԿԿ-ի հետ կուսակցական համագործակցությունը: ՉԿԿ-ն կարող է ՕԵԿ-ին ոչ միայն ֆինանսական, գաղափարական աջակցություն ցուցաբերել, այլև չի բացառվում, որ եթե Արթուր Բաղդասարյանը խոսք բացի կուսակցաշինության գործում իր ունեցած դժվարությունների, այդքան թափած ջանքերի, բայց արդյունքում հազիվ 83 123 ձայն ստանալու մասին, գործընկեր-կուսակցությունը կորոշի օգնել նաև մարդկային ռեսուրսներով: 1,3 մլրդ բնակչություն ունեցող ՉԺՀ-ի և 80 269 000 (2010թ. դրությամբ) անդամ ունեցող ՉԿԿ-ի համար ի՞նչ է մի քանի հարյուր, կամ, ինչո՞ւ ոչ, մեկ միլիոն չինացու «արտահանումը» Հայաստան դաշնակից կուսակցության շինության վեհ նպատակների համար:

Ճիշտ է, ՕԵԿ անդամները ՀՀ քաղաքացիներ են, բայց դե՛, Արթուր Բաղդասարյանն էլ ՀՀ Ազգային անվտանգության քարտուղարն է, իսկ Հայաստանը, ինչպես հայտնի է, կանգնած է արտագաղթի լուրջ պրոբլեմի առաջ. օր չկա, որ ընդդիմությունը, լրատվամիջոցները կոկորդ չպատռեն, թե Հայաստանը դատարկվում է: ՉԿԿ աջակցության շնորհիվ թե՛ իրենց երկրում տեղ չունեցող ու բազմացման հարցերում դժվարություններ կրող չինացիները կարող են մի նոր հայրենիք գտնել, որոնց Հայաստանի քաղաքացիություն ստանալու հարցում թիվ մեկ աջակիցը, բնականաբար, ԱԱԽ քարտուղարը կլինի, թե՛ ՕԵԿ-ը կդառնա Հայաստանի թիվ մեկ կուսակցությունը, թե՛ անձամբ ինքը՝ Արթուր Բաղդասարյանը, Տիգրան Մեծին հավասարազոր փառք կվաստակի՝ որպես Ազգային անվտանգության հիրավի ՄԵԾ քարտուղար (միանգամից մեկ միլիոնով ՀՀ բնակչությունն ավելացնելը, որոնց համար ՉԿԿ-ն կարող է նաև միլիոնավոր դոլարների ներդրումներ էլ կատարել՝ իր երբեմնի քաղաքացիների աշխատանքի, կեցության հարցերը ևս լուծելով)՝ դրանով իսկ ապահովելով իր համար այդքան բաղձալի վերելքը դեպի նախագահական աթոռ:

Լուսինե Կեսոյան