The Daily Star. Իրանը չի ընդունում ՄԱԿ-ի քննադատությունը

Իրանը հերքում է ՄԱԿ-ի Մարդու իրավունքների կոմիտեի քննադատությունը՝ կապված Իրանում կիբերանվտանգության ոլորտում ըմդունված ավելի կոշտ կանոնների հետ, ասելով, որ դրանք անհրաժեշտ են կիբեր հարձակումներից պաշտպանվելու համար և որևէ ընդհանուր բան չունեն մարդու իրավունքների հետ:

Իր վերջին զեկույցում ՄԱԿ-ի՝ Իրանում մարդու իրավունքների հարցերով հատուկ զեկուցող Ահմեդ Շահիդը նշել է, որ ինքը շատ մտահոգված է կառավարության գործողություններով, որոնք «խախտում են խոսքի ազատության և տեղեկատվություն ստանալու իրավունքները»:

Նա ասել է, որ իշխանությունները կասեցրել են այն կայքերի աշխատանքները, որոնք իրենց կարծիքով նպաստում են ահաբեկչությանը, լրտեսությանն ու սոցիալ-տնտեսական հանցագործություններին:

ՄԱԿ-ում Իրանի պատվիրակության անունից ուղարկված պատասխանում նշվել է, որ Իրանի կիբեր քաղաքականությունը կապ չունի մարդու իրավունքների հետ:

«Որպես մի պետություն, որը հաճախ է դառնում որոշ պետությունների կողմից կազմակերպվող պրոֆեսիոնալ կիբեր հարձակումների թիրախ` Իրանը ունի իրավունք և դրդապատճառ` ամրացնելու իր կիբեր անվտանգության հիմքերը»:

Իր պատասխանում Իրանը նշել է, որ Շահիդի զեկույցը կողմնակալ բնույթ է կրում և «չի արտացոլում Իրանում մարդու իրավունքների իրական կարգավիճակը»: