«Ժառանգության» և «Ազատ դեմոկրատներ»-ի միջև միջկուսակցական խնդիր չկա. Ռուբեն Հակոբյան

«Ժառնագության» և «Ազատ դեմոկրատների» միջև միջկուսակցական խնդիր չկա, մենք պատրաստ ենք շարունակել մեր գործունեությունն «Ազատ Դեմոկրատների» հետ: Այս մասին այսօր ԱԺ-ում ճեպազրույցի ժամանակ լրագրողներին ասաց «Ժառանգություն» խմբակցության ղեկավար Ռուբեն Հակոբյանը:

Այլ հարց է, որ մեր կողմից հայտարարվել է, որ Խաչատուր Քոքոբելյանը չի ներկայացնելու «Ժառանգություն» խմբակցությունը։ Ցավոք, Ալեքսանդր Արզումանյանը Խաչատուր Քոքոբելյանի հետ միասին հայտարարեցին, որ իրենք մնալով խմբակցությունում, ներկայացնելու են «Ազատ Դեմոկրատների» տեսակետը և պատասխանատվություն չեն կրելու «Ժառանգության» կեցվածքի հետ կապված»,-ասաց Հակոբյանը:

Խմբակցության ղեկավարը նշեց, որ իրենք առաջիկայում կհստակեցնեն իրենց դիրքրորոշումը նաև Ալեքսանդր Արզումանյանի հետ կապված: «Եթե իրենք գործնականում չեն ներկայացնելու «ժառանգությունը» և ներկայացնելու են միայն «Ազատ դեմոկրտաները», այդ դեպքում խմբակցությունն առաջնորդվում է հետևյալ սկզբունքով՝ խմբակցության բոլոր անդամները պետք է ներկայացնեն «Ժառանգության» տեսակետը, եթե չեն ներկայացնելու, ապա մենք կհստակեցնենք մեր դիրքորոշումը»,-ասաց Ռուբեն Հակոբյանը:

Ռուբեն Հակոբյանը նշեց նաև, որ ըստ ԱԺ կանոնակարգի՝ համամասնական ցուցակի առաջին երեք հորիզոնականներում գտնվող անձինք կարող են դուրս գալ խմբակցությունից, բայց մնալ պատգամավոր, եռյակից դուրս մյուս պատգամավորները, եթե հրաժարվում են կամ դուրս են գալիս խմբակցությունից, ըստ կանոնակարգի՝ պետք է վայր դնեն մանդատը: