Խանջյան փողոցի շինության փլուզման իրական մեղավորները

Օրեցօր մայրաքաղաք Երևանում կանաչապատ տարածքներին փոխարինում են նոր շինություններ, զվարճանքի կենտրոններ, սրճարաններ։

Նմանատիպ զվարճանքի կենտրոն պետք է դառնար Երևանի Խանջյան փողոցի օղակաձև զբոսայգում՝ «Jose» ռեստորանային համալիրի մոտ կառուցվող շինությունը, որի երրորդ հարկը երեկ փլուզվեց։

Փլուզումից ժամեր անց քաղաքապետարանի մամուլի բաժնից տեղեկացրին, որ Խանջյան 20 հասցեում գտնվող շենքի շինարարությունն  ապօրինի է եղել:

Ըստ քաղաքապետարանի՝ տվյալ հասցեում պետք է կառուցվեր բացօթյա սրճարան, զվարճանքի կենտրոն: Քաղաքապետարանը պարզել է, որ նշված ժամկետում շինարարությունը չի ավարտվել, ինչի առնչությամբ կազմվել է արձանագրություն, և քաղաքապետի որոշմամբ՝ 2 մլն դրամ տուգանք նշանակվել: Արձանագրություն կազմելուց հետո շինարարական աշխատանքները դադարեցվել են, և դրանք վերսկսելու համար պետք էր դիմել քաղաքապետարան և համապատասխան թույլտվություն ստանալ, ինչը չի արվել: Այսպիսով՝ կառուցապատողն օբյեկտի կառուցումը շարունակելու իրավունք չի ունեցել:

Չնայած այն հանգամանքին, որ քաղաքապետարանը հայտարարում է, որ շինությունն ապօրինի է, մեկ բան ակնհայտ է՝ առանց քաղաքապետարանի իմացության քաղաքի կենտրոնում շինարարական աշխատանքներ կատարելը պարզապես անհնար է։

Այսօր անգամ քաղաքի ծայրամասերում ապօրինի շինարարություն կատարելու դեպքում Քաղաքաշինության և հողի վերահսկողության վարչությունը քանդում է անգամ բազմանդամ ընտանիքի բնակարան հանդիսացող ապօրինի շինությունները։ Այս պարագայում պարզապես անհասկանալի է, թե Քաղաքաշինության և հողի վերահսկողության վարչության պետ Հայկ Ասատրյանը և ողջ անձնակազմն ինչպե՞ս կարող էին «չնկատել» բարձրահարկ ապօրինի շինությունը, այն էլ՝ քաղաքի կենտրոնում։

Ո՞վքեր են փլուզման իրական մեղավորները, ո՞րքանով է քաղաքապետարանը մեղավոր... հետևությունները թողնում ենք ընթերոցողին։

Նշենք, որ փրկարարները փլատակներից դուրս էին բերել 9 տուժածի: Բժիշկների գնահատմամբ՝ 4 տուժածների վիճակը ծանր է, բարեբախտաբար, զոհեր չկան։

Գայանե Համբարձումյան