«Հայաստանն առանց քաղբանտարկյալների» նախաձեռնությունը դեռ չի աջակցի Օսկանյանին

Այսօր մի խումբ քաղաքացիների կողմից սկիզբ դրվեց «Հայաստանն առանց քաղբանտարկյալների» նախաձեռնությունը։ Նախաձեռնության անդամները միավորվել են ՀՀ Սահմանադրությամբ ամրագրված ինքնիշխան, ժողովրդավարական, սոցիալական, իրավական պետության գաղափարի, դրանից բխող՝ «Հայաստանն առանց քաղբանտարկյալների» տեսլականի շուրջ։ Այս մասին այսօր լրագրողների հետ հանդիպմանը հայտարարվեց նախաձեռնության անդամներ Արեգ Գևորգյանի և Եվա Թովմասյանի կողմից։

«Ակտիվիստները հետևողականորեն պայքարելու են Հայաստանում առկա քաղաքական հետապնդումների արատավոր պրակտիկային վերջ դնելու համար»,-ասաց Արեգ Գևորգյանը։

Ըստ նախաձեռնության անդամների՝ այս ծրագրի համար հիմք է հանդիսացել նախորդ տարվա օգոստոսի 9-ին «Հայ ազգային կոնգրեսի» ակտիվիստների և ոստիկանության աշխատակիցների միջև տեղի ունեցած միջադեպից հետո մինչ օրս շարունակվող ՀԱԿ ակտիվիստների նկատմամբ քաղաքական հետապնդումը. այս տարվա հուլիսի քսանին հրապարակված դատավճռով վերջիններս դատարապարտվեցին 2-6 տարվա ազատազրկմամբ։

Պատասխանելով այն հարցին, թե ԱԺ ԲՀԿ խմբակցության պատգամավոր Վարդան Օսկանյանի արդեն հայտնի գործը կմտնի այս նախաձեռնության գործողությունների մեջ, Արեգ Գևորգյանը պատասխանեց. «Գործողություններ պատրաստում ենք իրականացնել մեր նախաձեռնության անվան շրջանակներում, գործողությունները կսկսենք քննարկել, երբ  մարդը լինի բանտարկյալ։ Այն, որ Վարդան Օսկանյանի նկատմամբ իրականացվում է քաղաքական հետապնդում, դա միանշանակ է, բայց այս նախաձեռնությունը կսկսի գործել, երբ վերջինս հայտնվի բանտում»։