Պուտինը Սիրիան ճանաչել է Ռուսաստանի տարածք. իրանական ԶԼՄ-ներ

Իրանական ԶԼՄ-ները 3 օր շարունակ նյութեր են հրապարակում Ռուսաստանի նախագահ Վլադիմիր Պուտինի և Թուրքիայի վարչապետ Ռեջեփ Թալիփ Էրդողանի միջև տեղի ունեցած ենթադրյալ հեռախոսային խոսակցության մասին: Իրանական Tehran-e-Emruz, Arman, Resalat թերթերը, հղում կատարելով թուրքական աղբյուրներին, մեջբերում են ռուս նախագահի խոսքերն այն մասին, որ Թուրքիայի կողմից Սիրիայի տարածք ներխուժելը Ռուսաստանի կողմից կդիտարկվի որպես ներխուժում իր սեփական տարածք, որին անհապաղ հետևելու է Ռուսաստանի արձագանքը: «Ռուսաստանը պատրաստ է պատերազմի, ես կատակ չեմ անում»,- իբր թե ասել է Պուտինը՝ վայր դնելով լսափողը:

Etemad իրանական պարբերականն այլ տեղեկություն է հաղորդում այն մասին, թե ով է առաջինը վայր դրել լսափողը՝ նշելով, որ ռուս-թուրքական հարաբերությունները լարվել են այն բանից հետո, երբ թուրքական կողմը Մոսկվայից Դամասկոս թռչող սիրիական ինքնաթիռը վայրէջքի էր հարկադրել՝ իբրև թե օդանավում զենքի առկայության կասկածանքով:

Keyhan-ն իր հրապարակած մի հոդվածում գրում է. «Պուտինը Սիրիան ճանաչել է Ռուսաստանի տարածք և Դամասկոսի վրա հարձակվելու դեպքում Էրդողանին սպառնացել պատերազմով: Դրանով իսկ Մոսկվայի համար Կարմիր գիծ է սահմանել»: Այս մասին գրել է պարբերականը՝ հղում կատարելով Риа Новости-ում հայտնված ՌԴ նախագահի այն հայտարարությանը, որ Սիրիայի անվտանգությունը նշանակում է նաև Ռուսաստանի անվտանգություն, և վերջինս պատրաստ է պաշտպանել Դամասկոսը բոլոր հնարավորին միջոցներով: