«Շախտյորի» դեմ բոլորը պատրաստվում են առավելագույն ուժերով. Հենրիկ Մխիթարյան

Հենրիկ Մխիթարյանը Ուկրաինայի առաջնության  «Շախտյոր»-«Տավրիա» խաղից առաջ խոսել է հանդիպման մասին իր ակնկալիքներից. 

– Հենրի՛կ, «Չելսիի» հետ խաղից առաջ դու լցված էիր լավատեսությամբ ու վստահությամբ։  Պահպանվե՞լ է արդյոք այդ տրամադրվածությունը «Տավրիայի» հետ խաղից առաջ։

– Այո՛։ Մենք պետք է խաղանք շատ լավ մրցակցի հետ։ Իհարկե, հեշտ չի լինելու, հատկապես, որ մեզ սպասվում է արտագնա հանդիպում։  Ինչպես միշտ, «Շախտյորի» դեմ բոլորը պատրաստվում են առավելագույն ուժերով, և լրացուցիչ դժվարություն մեզ համար լինելու է այն, որ  մենք խաղում ենք յուրաքանչյուր երեք կամ չորս օրը մեկ։

– Չեմպիոնների լիգայի խաղից հետո մոտիվացիայի հետ կապված ոչ մի խնդիր չի՞ լինի։

– Ո՛չ, մենք լավ ենք տրամադրված, քանի որ հաղթանակից հետո ավելի արագ ես վերականգնվում, և մեկ խաղից մյուսին անցնելն ավելի հեշտ է լինում։ 

– Ինչո՞վ են քեզ համար առաջին հերթին հիշարժան դառնում «Տավրիայի» հետ հանդիպումները։

– Նրանով, որ դրանք մեզ հեշտ չեն տրվում։ Հիշում եմ Սիմֆերոպոլում տեղի ունեցած նախորդ խաղը, որտեղ մենք հաղթեցինք միայն վերջին պահին։ Համոզված եմ, որ այս անգամ էլ «Տավրիան» պայքարելու է, և մենք ստիպված կլինենք մեծ ջանքեր գործադրել հաղթելու համար,- Մխիթարյանի խոսքերը մեջբերում է «Շախտյորի» պաշտոնական կայքը։

Նշենք, որ «Տավրիա»-«Շախտյոր» հանդիպումը տեղի կունենա հոկտեմբերի 27-ին։